Prome minister Evelyn Wever-Croes tocante RAft: “Nos tin supervision y nos tin CAft pero pa pas’e pa Tweede Kamer esey ta e preocupacion”

Prome minister Evelyn Wever-Croes a tene un conferencia di prensa ayera dialuna pa trece dilanti informacion tocante e negociacion cu Hulanda pa e tema di RAft, pa motibo cu na october e debe cu Aruba a presta for di Hulanda, di 916 miyon florin ta vence y Aruba mester pag’e of financi’e.

Hulanda a indica cu ta dispuesto pa refinancia Aruba mescos cu si a bay busca esaki riba mercado internacional pa un periodo di 20 aña y na un interes di 6% pa 8% cu probablemente lo yega na 6.5%, manera prome minister a sigura.

Di e placa aki, Hulanda mes ta paga 3% pa e fianza y ta fia Aruba na 6%, nan ta gana 3% riba e fianza aki y si tin un duracion di 20 aña, nan lo gana mas o menos 300 miyon florin. Prome minister a expresa cu esaki no ta un ayudo segun statuut, cual ta bisa cu ta yuda otro si Hulanda por baha interes, di locual Hulanda a bisa cu ta dispuesto pa baha interes te 3.2% pero cu e condicion cu nan kier pa hancra supervision financiero den un ley di Reino, rijkswet.

Na e momentonan aki e supervision financiero ta den man di Pais Aruba, Gobierno y Parlamento di Aruba; na Corsou y Sint Maarten e ta den man di Reino y esey ta locual nan kier pa Aruba den un rijkswet yama RAft, manera el a señala.

Nan a splica Hulanda varios biaha cu un rijkswet no ta funciona pa Aruba, pa motibo cu nan ta kere cu un ley di Reino ta bay ta hopi dificil pa cambi’e si circunstancianan cambia. E ley di Reino ta bay ta den man di Parlamento Hulandes pa tuma decision riba dje, no Parlamento di Aruba y ora Parlamento Hulandes tin cu tuma decision di algo cu ta asina leu di nan, nan no ta envolvi manera mester ta pa tin un bon producto di ley. Tambe ta puntra: ken ta e minister cu ta bay responsabilisa su mes pa wak si e ley aki ta funciona si of no?

“No ta e minister di Finanzas di Aruba mas, no ta Gobierno di Aruba mas ni Parlamento di Aruba mas, sino Tweede Kamer y unico minister cu Tweede Kamer por yama pa responsabilisa nan mes ta ministernan di Hulanda. Pues hala e supervision financiero for di man di Aruba pa pas’e pa Reino ta algo cu nos ta hopi preocupa.”

Gobierno di Aruba ta convenci cu un rijkswet asina rigido manera e RAft lo kibra economia di pais y tambe lo stroba crecemento, compara cu Corsou y Sint Maarten cu tin e rijkswet for di 2010 unda por mira e diferencia. “Ademas tempo cu Corsou y Sint Maarten a haya e rijkswet aki, nan a haya dispensacion di tur nan debe. Aworaki Hulanda kier forsa nos den un rijkswet, pero no kier duna nos niun cen di dispensacion di e debe di Covid-19. Nos ta pidiendo dispensacion di un parti di Covid-19 cu ta un pandemia mundial cu paisnan na mundo dificilmente por a atende nan mes so,” prome minister a bisa.

Di mesun manera, el a sigura cu Aruba ta un pais autonomo y a demostra esey cu pruebanan cu si supervision ta den man di Aruba e ta funciona, segun e mes a admiti. “Aruba ta e unico pais cu tin un surplus den Reino y ta pagando su debenan pa baha nan.”

Den un grafico, prome minister a mustra con e debe nacional a desaroya y ta na e momentonan aki unda aña pasa e debe cu den tempo di pandemia a subi cu 100%, a baha na 96.6% y e aña aki na 88.3% y ta sigui baha na 82% y na 2030 e meta ta pa baha te 70%.

“Nos no kier pa e desaroyo aki kibra. Si nos economia kibra, nos no ta bay genera surplus y nos no por paga debe back,” el a sigura.

Tambe, el a trece dilanti cu Algemene Rekenkamer di Hulanda a evalua e funcionamento di e Rijskwet financieel toezicht di Corsou cu Sint Maarten, similar na esun cu Aruba ta negociando awor, cu a base di evaluacion di Algemene Rekenkamer di Hulanda a yega na e conclusion cu RAft di Corsou cu Sint Maarten ta stroba desaroyo socio-economico di e paisnan y a urgi Gobierno di Hulanda pa evalua e funcionamento di esaki na e dos pais aki.

Pa loke ta trata Aruba, prome minister a sigura cu nan a pidi tambe pa evalua e funcionamento di LAft y CAft. “E evaluacion aki no a tuma luga ainda y nos ta di opinion cu miho e evaluacion aki tuma luga prome y despues nos tuma decision nos mester sigui den supervision financiero.”

Biniendo back riba e condicionnan di oferta di Hulanda, e condicion pa baha e interes na 5.1% pa e siguiente dos aña y despues di esey si nan lo yega di duna Hulanda e rijskwet e ora ey nan ta bah’e te 3.2%. “Esaki ta algo cu gobierno tabatin hopi problema cune. Sinembargo pa necesidad nos mester a acepta esaki na fin di aña 2020 y despues atrobe na fin di aña 2021,” prome minister a declara.

Bon Dia Aruba a puntra na prome minister lo siguiente: Si tin un ley di Reino cu e puntonan clave di e supervision di Reino aden, y cierto asunto legal local, no ta admitiendo cu tin supervision y cu e criterionan importante eyden? Cu otro palabra: gobierno ta acepta supervision, si of no?

Pa esaki prome minister a contesta cu esey ta e punto di discusion. “Pa supervision riba su mes, nos no tin problema cune, tur pais ta ser supervisa y Aruba ta ser supervisa for di 2014 y 2015 y esey a cambia e rumbo financiero di nos pais. Cu nos tabata contra e ley ey na e momento ey pero el a mehora si, el a zorg pa e derroche cu tabata tuma luga na e tempo ey pa e gobierno ey a stop, nos a stop di sangra y cura e herida, kiermen nos ta para pa supervision. E discusion ta e ora ken bo ta bay laga haci e supervision, bo ta lag’e den man di bo propio parlamento hunto cu CAft, of bo ta kit’e for di Parlamento y bo ta pon’e den man di Tweede Kamer cu CAft. Eynan mi tin mi preocupacion pasobra e parlamentarionan na Hulanda no ta lanta mainta y pensa riba Aruba, nan tin otro problemanan den nan cabes, nan ta lesa loke nan kier lesa y envolvimento den debate di siman pasa bo por mira cu nan no ta ni bon informa. Nos a convoca na un sesion tecnico cu tur e parlamentarionan na Hulanda cu nos minister plenipotenciario y expertonan di Aruba a duna pa comparti informacion. Di tur di nan, un a bin y otro a manda su fractiemedewerker, asina chikito e interes ta den parlamentarionan Hulandes riba e desaroyo di nos islanan. Y asina mes un di e esnan cu tabata representa a duna yen informacion incorecto. Nos tin cu pensa bon den crusada cu nos ta, ya caba nos tin supervision y ya caba nos tin CAft pero pa pas’e pa Tweede Kamer, esey ta e preocupacion cu tin,” el a sigura.

Ademas a finalisa bisando cu den e proposicion “Hibride” por bisa cu casi nan ta aceptando, pero den esey cu nan mes a propone nan a pidi pa den e rijskwet e ora e obligacion di pais Aruba di tin normanan y supervision y den landsverordening ta pone cua ta e normanan y cua ta e supervision, pero den e proposicion ey Hulanda a bisa cu nan kier un rijskwet y den esey nan ta aworaki, continuando cu e negociacion.