Dialuna ultimo durante un conferencia di prensa di prome minister Evelyn Wever-Croes, el a splica cu e aña aki ta di Innovacion y Enseñansa. Innovacion ta hopi importante pa maneho di Gobierno y tambe pa comunidad, y como mundo ta cambiando asina lihe, nan tambe mester cambia cu mundo.

Wever-Croes a expresa cu innovacion tambe ta importante pa prepara e pais riba e cambionan. Segun el a duna di conoce, Gobierno tin un vision pa innovacion den e pais, pero esaki sin accion ta keda na soño.

Pa esaki, el a menciona cu a institui e Fundacion FUTURA, cu den nomber di Gobierno ta stipula y ehecuta e maneho di innovacion. Nan a haci entrega di su relato anual siman pasa den cuala splica cu a haci mas di 40 proyecto cu ta envolve miles di persona.

E aña aki ta enfoca riba 5 plan specifico, cuminsando cu eGoverment, cu ta trata di e parti di digitalisacion di Gobierno. Hunto cu Estonian Academy ta finalisando e rout map cu lo wordo publica dentro di poco.

Hunto cu e cambio aki, por wak cu departamentonan di Gobierno ta bay ta mas lihe, mas facil y mas sigur, segun Wever-Croes a anuncia, como tambe por ofrece mas servicio online. Pa fin di aña aki caba algun di departamento lo ta online.

“Fin di dia, esaki lo mehora e calidad di bida di nos ciudadanonan”, el a sigura.

E siguiente proyecto ta yama ‘100 Innovations’, cu ta un competencia cu ta habri pa tur ciudadano y organisacion na Aruba, cu e meta di curasha pa bin y trece ideanan pa haci cos nobo. Retonan ta presenta tur ora, pero mester innova den e manera con por atende cu nan pa yega na un solucion rapido.

Wever-Croes a comenta cu e aña aki nan kier identifica e 100 miho proyecto di ynnovacion y asina yuda nan pa ricibi fondonan y training pa e idea por transforma den accion.

Di tres area di prioridad di Innovacion, nan ta yama ‘B-Lab’ na Santa Cruz. Aña pasa a crea dos laboratorio tecnico ubica na Playa y otro na Biblioteca na San Nicolas y den aña aki lo bin cu e di tres ubica na Santa Cruz cual ta bay ta un poco diferente.

El a bisa cu esaki na Santa Cruz lo enfoca riba ‘Biotechnology y Agricultura’. Lo permiti e muchanan hunga y cera conoci cu diferente tecnica di tecnologia y ciencia cu por aplica riba e tereno aki y asina desaroya nan tambe pa bay mas den direccion di agricultura, pero cu un modelo mas innovativo.

Wever-Croes a duna di conoce cu nan a scoge e districto di Santa Cruz pa motibo cu tin un historia di agricultura grandi den e bario y te ainda por mira esey.

Future of Work Vocational Training ta di cuater proyecto cu ta trata riba training pa cursonan, pero tambe opleiding dirigi riba area di siguridad cibernetico. Segun Wever-Croes a expresa, e tema aki ta birando mas importante rond di mundo y tambe na Aruba, con hende ta proteha su datonan y e siguridad den mundo digital, con por enfoca mas riba privacidad.

Wever-Croes a indica cu hende cu interes riba e opleiding aki mester tin conocemento di Tecnologia di Informacion (IT) na un nivel hopi avansa. A lansa esaki hunto cu ministerio di Labor, y ta bay busca nan propio hendenan pa por prepara nan den area di ICT y siguridad cibernetico pa nan mes por yuda Gobierno den su trabou.

Wever-Croes a sigura cu Gobierno a pensa riba hobennan cu ta recien gradua di scol y cu por tin afinidad y interes den area aki. Tambe pa hoben y adultonan cu no tin empleo, por ehempel, hobennan cu a caba EPB cu Gobierno mester pa haci cierto mantencion den aspectonan tecnico.

“E idea ta cu nos kier crea talentonan nobo riba e tereno di ICT y siguridad cibernetico riba tur nivel”, el a referi.

Asina mes, e cursonan aki ta pa fin di dia e hobennan aki ta esunnan cu ta percura pa Gobierno tin capacidad pa sigui carga e vision di eGovernment tambe.

Di cinco proyecto, el a menciona E-Learning cu ta e di dos proyecto piloto di digitalisacion na scolnan. E prome tabata na scol Cacique Macuarima y Aterima cu a cuminsa aña pasa. Pa e aña aki nan a scoge colegio Pastoor Kranwinkel di Paradera como e di dos scol cu ta bay aplica e proyecto piloto aki, na unda muchanan lo haya les di computer pa asina desaroya e ‘21 Century Skills’ – pa muchanan haya e habilidad pa por ta exitoso den siglo 21.