Den un conferencia di prensa, prome minister Evelyn Wever-Croes a duna un update y a señala cu e ta sinti su mes preocupa pa e situacion di hotel Secret’s baby Beach, unda algun ciudadano ta buscando nan derecho pero di otro banda, nan como gobierno ta kere den proyecto aki.
“Nos ta kere cu e proyecto di Secret’s por trece hopi beneficio pa Aruba, pero specialmente pa San Nicolas. E ta bay cambia e dinanismo di e desaroyo economico di San Nicolas y e ta bay percura cu esnan cu ta biba na San Nicolas pero ta traha na Eagle aworaki, por ta dos of tres ora nan ta pasa den transporte publico pa nan yega na nan trabao, y nan por traha eynan mes, lo cual ta algo positivo. Ta un area cu nos no a pensa nunca cu lo tin un interes pa desaroya y e ta trece un polo economico cu ta bay draai e economia,” prome minister a sigura.
Pa loke ta trata e caso den corte, hues a pidi pa traha un decreto nobo teniendo cuenta cu algun instruccion specifico cu corte a duna y e departamentonan encarga riba esey. E contesta segun prome minister a indica, a bay recientemente pa e habitantenan.
“Mi mester bisa cu durante e periodo aki mi a pidi e departamentonan no solamente traha un decreto nobo, sino por fabor bolbe sinta na mesa. Nan a purba casi un luna largo pero esey no a tuma luga. E decreto a sali y awor si m’a compronde cu habitantenan kier sinta na mesa y nos lo sinta na mesa tambe pa delibera riba e tema akinan,” el a sigura.
Na final di dia, tur ciudadano di pais Aruba tin su derecho y nan ta respeta esey. Pero ora ta trata di desaroyo di pais Aruba, nan ta pone un tiki mas di enfasis riba dje. “Nos ta sigui kere den e proyecto y lo ta un lastima si e ta stop pa motibo cu e ta tardando demasiado pa nan ranca sali manera nan kier, y lo ta un lastima hopi hopi grandi y ni papia mes di un riesgo berdad di daño y perhuicio. Nos ta haciendo di nos parti lo maximo pa e proyecto aki por bira un realidad,” prome minister a finalisa.
