Ayera mainta prome minister demisionario Evelyn Wever-Croes a tene un conferencia di prensa pa informa comunidad tocante kico ta nifica ora un gobierno ta demisionario y con esaki ta na e momentonan aki pa loke ta trata deliberacion cu Hulanda.

Prome minister a indica cu ora un gobierno ta demisionario por tuma decisionnan solamente riba asuntonan coriente, decisionnan, proyectonan of maneho cu tabata aproba den presupuesto cu a entrega na Parlamento di Aruba pa aña 2024.

Pa loke ta trata negociacion cu Hulanda, el a bisa cu aworaki esey ta na nivel entre ekipo di negociacion di Hulanda y ekipo di negociacion di Aruba, nan a reuni caba na final di luna di juli y awor na final di e luna aki nan tin cu reuni back unda ekipo di Aruba mester biaha Hulanda pa sigui negocia y nan ta trahando pa cu e diferente aspecto riba e rijkswet.

“Ta pa nos por logra cumpli cu e condicion di Hulanda pa por baha e interes riba e debe di Covid aun mas, un bes cu nan lo bin for di Hulanda y tin un consenso na nivel ambtelijk con e articulonan den ley lo mester defini, lo mi bay parlamento y sondea cerca parlamento kico ta lo cual cu nan ta sinti,” el a bisa.

El a informa cu nan a parti e trabou den dos fase, e prome fase ta contene tur e puntonan cu no tin discusion na unda prome minister mes a sigura cu den esaki e no ta spera mucho problema, pero asina mes cu nan lo yega na otro, nan ta bay parlamento cu e parti aki pa parlamento duna su opinion.

Den e di dos fase, nan ta pendiente di Fondo Monetario Internacional (IMF) pa motibo cu nan a acorda cu secretario di estado anterior, Alexandra van Huffelen cu nan lo acerca IMF pa yuda nan cu e normanan financiero.

“E normanan financiero manera cu nos tin awor hancra den ley di LAft, cu nos ta den cumplimento cu nan, pero nos ta sinti cu nan ta rigido, nan no ta yuda Aruba ta flexibel na momento cu mester ta flexibel. Tin biaha Aruba por realisa surplus mas halto, pero si bo ta keda na minimo 1% no tin e push pa bo por haci esey, pero tin biaha cu 1% tampoco ta 24.59 pero bo no tin e flexibilidad tampoco.”

P’esey nan a palabra cu IMF tocante loke ta e normanan y ora e final di luna aki nan lo caba cu esey cu normanan nobo “pasobra Aruba ta den un situacion diferente, nos tin surplus, nos ta bahando nos debe considerabel yegando casi na lo cual ta aceptabel pa un pais manera Aruba y e ora ey pa wak si nos tur ta bay di acuerdo, si no, nos mester bay negocia y esey e ora ta planifica pa cuminsa y culmina na october mes,” prome minister a bisa cu tambe lo mester informa parlamento riba e punto aki.

Nan mester adapta e skema y nan tin e palabracion cu e ley aki mester ta na parlamento pa dia 1 di mei 2025 pa motibo cu e tin cu bay Raad van Staten y esey ta tuma di dos luna pa tres luna, ademas tambe tin cu bay na Raad van Advies “pero pa esey cu e caida di gobierno ta bira dificil, pero Hulanda ta compronde. Nan no kier palabra di un gobierno demisionario cu despues ta cambia, dus nan ta mustra e disponibilidad di carga pasenshi y asina nos ta yega na algo cu tur hende ta para su tras.”

Ademas, el a informa cu nan ta haciendo tur e preparacionnan pero tur cos ta depende di e resultado di eleccion di 6 di december y gobierno nobo lo tuma decision riba esaki.

Riba e pregunta si lo destina placa di surplus pa paga salario di empleado envez di paga debe y haci inversion, prome minister a señala cu nan ta pagando e debe pero Aruba mester di inversion, “nos ta pagando nos cuotanan di nos debe manera ta palabra, hasta nos ta pagando adicionalmente cada aña, pasobra surplusnan cu bin of entradanan extra cu bin bo no por usa nan ni pa paga salario ni pa haci inversion solamente mita so, y e otro mitad ta bay automaticamente pa paga e debe,” prome minister a sigura.

Esey ta nifica cu nan ta pagando e debe manera cu nan por y ora nan ta haya placa extra ta bay pa paga e debe y e resto nan wardando pa haci inversionnan den e pais “p’esey nos tin palabracion cu Hulanda cu den nos ley hancra, cu ora cu tin entradanan adicional (meevaller) cu bo no a tene cuenta cune, mita mester bay pa paga debe y mita pa inversion.”

Pa loke ta trata entradanan extra pa e aña aki, prome minister a informa cu ta di 80 miyon florin di placa cu a resta of di gasto cu a baha “pero di e 80 miyon aki nos no por bisa cu nos ta bay paga salario, no. E ley ta bisa cu 50% ta pa paga debe y e otro 50% ta bay pa inversion,” el a bisa.

Nan a proba diferente proyecto den e conseho di minister e cual awor mester wordo aproba na parlamento prome cu nan lo wordo ehecuta.

A haci otro pregunta na prome minister tocante si tambe ta e evaluacion de si mester aumenta edad di pension pa 66 aña, di esaki el a sigura cu nan no tin ningun intencion di hisa e edad di pension “den e Landspakket ta palabra cu si ta recorda na aña 2020 mes ora cu Hulanda a manda e e prome Landspakket, tabata para den dje cu edad di pension mester bay na 67 aña y nos a bisa cu nos no ta acepta esey. Si esey ta keda aden, nos no ta firma e Landspakkete. Pa nos a logra firma toch, na november 2020 e wording a wordo cambia, e palabracion cu nos tin cu Hulanda ta cu na aña 2025, cu ta otro aña, ta bay haci un estudio con fuerte e fondo ta.”

Si lo resulta cu e fondo ta fuerte, no tin modo di cambia nada. Si ta resulta cu e fondo no ta fuerte, Aruba tin e responsabilidad di bin cu un plan con pa haci’e fuerte “pero esey lo a haci irespet di palabracion cu Hulanda, nos kier pa e fondo keda fuerte pasobra nos tin hopi hende cu awor ta depende di dje y a nos tambe un dia ta bay depende di dje pasobra nos ta pagando e prima pa e no kibra. Otro aña e investigacion lo wordo haci, mi no sa kico exactamente ta bay sali di dje y e recomendacionnan cu lo sali, pero mi ta imagina mi cu tin varios opcion cu solamente hisa edad di pension,” prome minister a comenta.

Un di e opcion lo por ta cu por bin cu un combinacion, si lo hisa e prima un poco of gobierno por hinca un accion financiero den dje. “Tin diferente opcion pero otro aña nos ta laga estudio tuma luga y despues nos lo mira kico ta e recomendacion y mi ta kere cu cualkier gobierno lo tuma e decision pa rescata e fondo aki,” prome minister a finalisa.