Despues cu dia 23 di mei ultimo minister di Turismo Dangui Oduber a presenta e cifranan di proyeccion di turismo pa loke ta trata aña 2023, di esaki tambe a bin dilanti cu grado di ocupacion pa resto di aña por ta 9% mas abou compara cu aña 2019.

Pa loke ta trata crecemento di Crecemento di e Average Daily Rate (ADR) vs 2019, e demanda cu tin pa Aruba ta keda demostra den e prijs di camber pa dia, minister a menciona cu segun e cifranan duna pa AHATA esaki ta mas halto cu nunca, e averahe di e ADR den e prome 4 luna di aña 2023 ta $393,59 dollar pa camber mientras cu na aña 2019 esaki tabata $334,67 dollar pa camber, si ta compara esaki cu e ADR di aña 2022 di e mesun temporada ta constata un crecemento di 13.9% porciento di e ADR y segun minister Oduber pa prome biaha e ADR ta yega den careda di $400 dollar.

Pa loke ta trata crecemento den turistanan Stayovers vs 2019, den e prome 4 lunanan di aña 2023 tur luna a conoce un recuperacion di mas di 100%, esaki ta indica cu tin un crecemento den e cantidad di bishitantenan di “Stayovers”, den esaki a informa cu durante e prome 4 luna Aruba a ricibi un total di 415.648 mil turista “stayover” cu ta un recuperacion di 7.2% compara cu 2019.

Den luna di januari y februari a recupera cu 105%, na luna di maart tabata tin un recuperacion di 102% y na april un recuperacion fuerte di 116%.

Den e rapport a keda demostra cu e mercado Mericano ta keda e mercado mas importante pa Aruba, e mercado aki a conoce un recuperacion basta grandi, na unda den luna di januari e mercado Mericano a recupera cu 113%, na februari 108%, na maart 102% y na april e tabata 120% cu ta hopi significante.

Pero e mercado cu mas a sobresali y cu mas a recupera den porcentahe ta e mercado di Colombia, den esaki minister Oduber a indica cu esey ta debi na e aumento di e “Air lift”, cantidad di stoel di y pa Colombia, lo cual a duna un recuperacion den e prome 4 luna como: januari 104% – februari 159% – maart 145% y april 130%.

Por a constata tambe cu ocupacion di camber ta kedando atras compara cu aña 2019, averahe di ocupacion di camber di hotel lo keda como 9% bao di e nivel di 2019, na solamente 77% na unda por tuma na cuenta anto cu esaki ta a base di menos reservacion, al menos esey ta anticipa na e momento aki.

Pa esaki, redactor di Bon Dia Aruba a puntra prome minister Evelyn Wever-Croes den un conferencia di prensa di dialuna ultimo kico ta su opinion tocante esaki na unda el a sigura cu maneho di gobierno ta dirigi riba e logro di nan metanan. “E crecemento di turismo aworaki ta un crecemento ya riba nos propio expectativa y mi ta sigur cu nan ta tene cuenta tambe cu durante aña e por baha un poco, pero cu e nivel promedio ta keda e nivel cu nos tin mester pa nos por logra e metanan economico y financiero di nos pais,” el a sigura.

AHATA ta constata cu e grado di ocupacion talbes a baha pero ATA su tarea ta pa percura pa yena e cambernan ey y sigui cu un mercado agresivo pa Aruba, ademas el a enfatisa cu e tin tur confiansa cu esaki lo logra y esaki ta un di e puntonan cu International Monetary Fund (IMF) a remarca den su reciente rapport.

Prome minister a splica cu IMF ta bisa “cu a pesar cu e situacion financiero ta mustra un poco mas miho, mester tene na cuenta cu si algo mester pasa, como por ehemplo, economia Americano lo pega, esey ta bay afecta Aruba su turismo y nos ta tumando na cuenta esaki.” Tabata 17 di mei ora Aruba Hotel and Tourism Association (AHATA) a publica un comunicado indicando e cifranan di proyeccion pa ocupacion di aña 2023 unda nan ta señala cu ta 9% menos cu 2019.

Nan a acumula e cifranan di ocupacion y prijs di hotelnan tur luna y CEO di AHATA, Tisa LaSorte, ta raporta cu den luna di April e grado di ocupacion ta menos cu 2019, pero e balor averahe di cada camber bendi a aumenta y consecuentemente e RevPAR ta mas halto.

Pa april 2023

Ocupacion: E grado di ocupacion tabata 79.3%; cual ta 1.2% menos cu grado di ocupacion na April 2022.

ADR: E balor averahe di cada camber bendi tabata $350.58; un aumento di 8.5% compara cu April 2022.

RevPAR: E entrada averahe pa tur camber disponibel tabata $278.14 cual ta un crecemento di 7.2% compara cu April 2022. RevPAR ta e indicador principal di e resultado financiero prome cu desconta gastonan operacional y impuesto.

Pa Januari – April 2023:

Ocupacion: E ocupacion averahe di prome 4 luna tabata 82%; un aumento di 23.5% compara cu e mesun temporada na 2022.

ADR: E balor averahe di cada camber bendi tabata $393.59; cual ta 14% mas cu mesun temporada na 2022.

RevPAR: E RevPAR averahe di prome 4 luna tabata $324.48; 40.7% mas compara cu e mesun temporada na 2022.

Proyeccion:

Proyeccion actual pa ocupacion averahe di hotel pa Mei ta 77%, Juni ta 74%, y Juli ta 78%. Expectativa pa ful aña 2023 su ocupacion ta 77%, cual ta representa un reduccion di 9% compara cu e averahe di aña 2019.

Timeshare:

Ocupacion na propiedadnan Timeshare tabata 86% na April.