Den un conferencia di prensa, ayera mainta prome minister Evelyn Wever-Croes y minister di Finansa Xiomara Maduro a bin dilanti pa asina informa comunidad cu Aruba den reunion di conseho di ministernan di Reino di ayera mainta a dicidi pa Aruba no haya un aanwijzing.

“Nos ta hopi satisfecho cu e decision akinan cu sigur no tabata facil, e tabata un trabou hopi, hopi intenso, di hopi luna saliendo for di un pandemia y un trabou grandi di hopi hende”, prome minister a sigura.

El a gradici na e profesionalnan den area financiero y den area huridico igualmente cu na minister Maduro pa motibo cu esaki tabata e pio tempo financiero pa e pais y ta un reto grandi, manera el a bisa.

Ademas, el a indica cu Aruba tabatin un deficit na aña 2020 di 1.028 miyon florin y den apenas tres aña nan ta logrando elimina e deficit aki segun el a indica, pa via di un esfuerso y un resultado di hopi autoridadnan financiero.

Pa e aña aki, nan a cuminsa e aña cu un deficit di 227 miyon florin y despues nan a logra bah’e na 148 miyon florin, a base di esey CAft a bisa cu esey no tabata suficiente y kier mira pa baha e cifra ey unda cu for di eynan e discusion tocante aanwijzing a cuminsa for di juni y juli di e aña aki.

“Danki na e crecemento economico di nos pais cu a genera mas entrada, danki na esfuersonan di Departamento di Impuesto pa cobra mas belasting di esnan cu no ta den cumplimento den e parti di compliance, nos a logra pa baha e deficit aun mas cu 32.5 miyon florin na ultimo momento cu ta lo cual cu Hulanda a indica e ora cu ta suficiente pa evita e aanwijzing”, prome minister a bisa.

Awor nan ta preparando e ultimo cambionan den e nota di cambio pa 2022 pa manda esey pa parlamento pa asina ey por trata esaki e aña aki ainda, prome minister a expresa cu el a compromete su mes cu parlamento pa duna nan defensa contra e aanwijzing pero e no a duna esey tanten cu e caso no ta cla pa motibo cu e ta un asunto entre gobierno cu gobierno “y un guera canta ta un guera perdi, conociendo oposicion cu ya caba ta saca tur informacion personal di hendenan mes, nos a dicidi di no duna nan pero entrante awe mainta e ta den man di parlamentarionan y ma cumpli asina cu mi palabra na parlamento un biaha mas”, el a bisa.

Mientras tanto, Aruba ta sigui comprometi pa traha riba e reformanan, riba e landspakkete, riba bahamento di gasto den forma structural, riba aumenta nos entrada na un forma structural, di esaki, prome minister a señala cu mester para keto un rato riba kico lo tabata ta si Aruba lo a haya un aanwijzing, “nos ni un no sa kico un aanwijzing lo a contene, pasobra nunca Hulanda a indica con e lo bay hink’e den otro, pero loke si nos sa cu nan lo a impone e ora medidanan riba Aruba pa cumpli cu tur e recomendacionnan di CAft y nos a purba di splica nan di tur manera posibel cu no ta tur recomendacion bo por ehecuta sin mas den un pueblo cu ya ta sufriendo, pasobra si un aanwijzing a bin lo nos mester a tuma mas medida di hisa mas belasting riba lomba di pueblo, of nos mester a corta hopi mas den servicionan di gobierno como servicio di departamentonan social, bijstand, polis, enseñansa y p’esey nos a bisa awe danki na dios cu nos no a haya e aanwijzing aki y esaki ta un dia cu henter Aruba mester ta celebrando”.

Igualmente, nan ta sigui traha pa logra un surplus pa 2023 y cu te ainda presupuesto ta entrega na parlamento cu un deficit di 0.5%, nan ta logrando caba pa haci un balans budget pero nan esfuersonan lo continua pa otro aña pa converti esey den un surplus.

Prome minister tambe a trece dilanti cu nan ta bin riparando cu tin hende cu ta perdiendo confiansa den gobierno y cu otronan ta haci esey como un hobbie pa crea desconfiansa den gobierno, pero nan como gobierno a demostra un biaha mas cu ora nan ta bisa algo, nan ta haciel’e.

Tambe, el a informa cu un di e prome cosnan cu nan ta a tene cuenta cune ta aña 2023, unda Hulanda ta keda para riba e punto di tin un surplus di 1% den cual nan ta haciendo nan maximo esfuerso pa tin un balans budget mescos cu Corsou y Sint Maarten, pero esaki no a wordo trata ainda den parlamento y awor cu nan sa cu nan por rond af 2022 e ora ey nan por concentra tambe mas riba 2023, pa motibo cu prome minister a comenta cu e mesun hende tabata concentra riba e aanwijzing cu riba 2023.

Un otro punto cu tambe a keda pendiente pa discuti cu Hulanda ta e tema di COHO y e tema di RAft, cu ta temanan cu ta riba mesa ainda y pa esey tin un reunion riba gobiernonan cu ta planea pa na november pero nan no sa si esey lo tuma luga na Corsou, Sint Maarten of Aruba.

Di su parti, minister Maduro a splica cu e trabou no a caba, ayera mainta mes nan a sinta un rato cu CAft ken ta di bishita tambe na Aruba pa asina nan por pasa riba e puntonan.

“E realidad financiero no ta caba, e no ta cambia pero si ta asina cu a nos tin cu duna di nos parti pa nos por haci e cambionan cu a nos kier mira realisa”, minister Maduro a declara.

Ayera a bin un punto cu manera el a sigura, por trece trankilidad, cu ta hopi necesario pa asina nan por tin e confiansa y e forsa pa por sigui traha y bay dilanti, aworaki nan ta enfoca riba bay bek na e situacion caminda no tin deficit mas y pa maneha e debe grandi cu pais Aruba tin.