Ayera atardi, prome minister Evelyn Wever-Croes mediante un comunicado pa prensa a informa cu “agredi y insulta nos bishitantenan no ta e solucion y ta contra nos principionan,” referiendo na loke a sucede diadomingo ultimo na Baby Beach durante un protesta pacifico dirigi pa un grupo ambientalista.

Pa esaki, a señala cu Aruba mester a cera frontera tempo di pandemia di Covid y no por a ricibi ningun turista. Tabata momentonan di hopi preocupacion pa henter e pueblo, pa Gobierno, pero sigur pa esnan cu ta biba di turismo. Un parti grandi di e poblacion ta biba di turismo y Aruba ta conoci pa su cordialidad. E ta hasta hancra den e himno y ta identifica e pueblo di Aruba.

Segun a sigura, Gobierno ta compronde y ta comparti e preocupacion di “overtourism”. Pa e motibo aki mes “Gobierno a tuma e decision di no duna mas tereno ni permiso pa mas hotel. Manera ya ta conoci, Gabinete Wever-Croes I a hereda entre 7,000 pa 8,000 camber ora nan a sinta y a traha duro despues di esey pa logra baha e cantidad aki.”

E mandatario ta indica cu su persona como prome minister casi tur siman tin caso den corte unda empresanan ainda ta forsa Gobierno pa cumpli cu e promesanan duna door di e gobierno anterior.

“Nos ta sigui bringa cada caso den corte. Nos tampoco kier “overtourism” na Aruba. Tin proyectonan grandi cu ya lo wordo finalisa e aña aki. Ainda tin algun den ‘pipeline’ cu e permisonan duna door di e gobierno anterior y cu no por a wordo kita, pero despues di esey no tin mas. E preocupacion di e pueblo ta conoci cerca nos Gobierno y nos ta comparti esaki, pero agredi y insulta nos bishitantenan no ta e solucion, e ta contra nos DNA, contra nos principionan. Nos ta un pueblo cordial, laga nos corda esey prome tur cos. Laga nos semper ta cordial cu nos mes localnan y cu nos turistanan, esey ta un caracteristica cu ta distingui nos y ta haci nos grandi. Hunto nos lo traha y yega na un solucion y sigui padilanti construyendo un Aruba miho pa nos tur.”

Diadomingo a surgi un discusion riba rednan social pa loke ta trata e protesta pacifico cu activista ambiental Nigel Maduro ta bin haciendo na diferente beach, unda tin varios construccion di hotel tumando luga. Pa esaki tambe e minister encarga cu Turismo a afirma cu e protesta aki di diadomingo ultimo “tabata uno agresivo y perhudicial,” y a urgi nan reflexion riba e impacto di tal comportamento contra e turismo di Aruba.

Nigel Maduro: A bin pinta nos como hende loco y agresivo y esey no ta berdad

Sinembargo, Nigel Maduro a dicidi di haci un “Live” riba su Facebook page pa asina duna su banda di medaya tocante loke a sucede na Baby Beach e dia ey, caminda segun el a sigura, “un medio di comunicacion local, turistanan, hende local y negoshinan a cambia full un narativa cu no ta berdad.”

Como parti di su declaracion, minister di Turismo Dangui Oduber a señala cu “un biaha mas nos ta lamenta e tipo di e accionnan aki, cual mi ta considera como accion violento, accionnan agresivo y un atentado contra nos turismo.”

Pa esaki, Nigel Maduro a dicidi di bin dilanti y splica cu “nan a bin pinta nos como hende loco y agresivo y esey no ta berdad.”

El a conta cu a organisa un Beach Party e cual ta un accion di protesta pacifico na Baby Beach diadomingo ultimo unda for di oranan trempan mainta ora nan a yega nan a haci un Beach Clean Up unda el a sigura cu tin video cu ta mustra con hendenan a laga e beach e dia anterior. “Nan a laga hopi sushi, nos a cuminsa piki tur e sushi cu nos mannan y hasta na Big Mama. Nos tin video con tur e bari di sushi tabata yen y anos a bay limpia y haci espacio presentabel y bunita pa hendenan cu ta bin na e Beach Party, pa hendenan local y turistanan cu ta bin Baby Beach y wak e bunita,” el a bisa.

Nan a pone Aruba su bandera na e tentnan pa mustra cu esey ta Aruba su tera y eynan nan a ripara cu e hendenan di e restaurant a bin set up e tentnan y a bin mas cerca di e palapanan. “Esaki ta e motibo di pakico nos a bin na e Beach Party pa nos reclama nos lama cu semper ta wordo kita pasobra nan ta pone beach tent, beach chairs y tur cos cu ta pa turista, y localnan ta keda patras,” Maduro a bisa.

E tentnan a yega na unda nan tabata ubica na e palapanan, unda Maduro a sigura cu esey tabata pa crea espacio pa “nos hendenan” y a pone un beach tent dilanti e palapa unda Maduro tabata ta. “Nos view full blokia, nos a hala nan atencion y aparentemente tabata local esun cu a bay huur e tent, y nos a bisa nan ‘hey, bo ta local, nos tin un espacio pa bosonan bao di e palapa, bo mag di join nos;’ pero a bisa cu e no kier y ta prefera di paga 100 florin.”

Pa Maduro, esaki ta algo inhusto y desigual di e beachnan di Aruba. “Cu e hendenan cu tin cierto privilegio anto tur otro local of turista ta haya e beach blokia y bo no ta wak e view.”

“El a bira un discusion hopi grandi, nombernan a wordo yama, insulto a bin riba mi, nan a insulta mi apariencia. Despues e trahadonan di e beach tent a bin insulta y intimida. A mi a djis bisa, bo no tin cu haci e cos ki, nos kier djis espacio pa wak e view.”

Opinion tocante e incidente ta dividi, cu algun persona subrayando cu en berdad e beach y palapanan ta publico y cu no tabata corecto cu e persona aki a core cu e turista pa simplemente pone su pertenencianan banda di un palapa cu el a “reserva”.

Di otro banda algun otro usuario ta compronde y ta apoya e causa, mirando cu poco poco turismo ta apoderando di varios espacio publico, lagando e localnan cu poco oportunidad pa disfruta. Pero hopi ta subraya cu e manera con e persona local aki a actua y core cu e turista y su yiu, no tabata e manera corecto.

Maduro a enfatisa cu e medio local na momento di informa, a cambia e mensahe di loke nan tabata kier bisa di e protesta y a enfoca riba turistanan cu tabata “insulta nan” y nan a keda splica riba cierto cosnan cu no a pasa. “Esey no a pasa. Bo ta letterlijk gañando e hendenan”, el a expresa.