Den un conferencia di prensa extraordinario di Gobierno di Aruba ayera nochi, cu presencia di tur minister incluyendo prome minister Evelyn Wever-Croes, a anuncia cu resultado di maneho financiero pa aña 2023 ta “hopi estricto y responsabel”.
Segun Wever-Croes, debi na entrada adicional y maneho estricto, esaki ta un aña remarcabel unda tin fondo pa haci inversion adicional. E di dos presupuesto complementario tin fondo adicional manera prome minister a expresa, cu 25 miyon extra. “Ta prome biaha cu algo asina ta sucede pa nos por inverti den proyectonan importante,” Wever-Croes a comenta.
Minister di Finanzas y Cultura, Xiomara Maduro a splica cu e presupuesto complementario aki nan a conoce un novum cu a bay Parlamento di Aruba, y aworaki ta tratando e cambionan di fin di aña y nan resultado financiero.
Importante pa indica cu e cambio principal di esaki ta cu ta bay ehecuta e maneho di meevaller, algo cu a ser palabra na 2018. Maduro a comenta cu tur lo cual ta riba 1% di surplus ta bay 50% pa inversion y 50% pa paga debe. Na momento cu a actualisa e cifranan conforme e realisacion, esaki a produci un surplus di 1.8% di GDP. Pues riba e 0.8%, cu ta 50.2 miyon florin, ta bay aplica e maneho di meevaller. Di esaki 50% ta bay pa paga debe adicional, cu ta 25.1 miyon florin y e otro 50% ta bay pa haci inversion.
Ta bay tin cambio pa cada ministerio, y Maduro a indica cu pa su ministerio ta bay aloca 2.4 miyon florin di fiansa pa estudio pa cubri gastonan incidental cu lo por tin na SABA. Tambe lo tin un inversion extra di 25 mil florin na CAD pa hefboom automatico.
Otro minister cu a hiba palabra tabata minister di Asuntonan Economico, Geoffrey Wever. El a menciona cu e resultado pa 2023 ta mas cu positivo y esey ta danki na crecemento economico den ultimo aña.
El a bisa tambe cu e presion cu tin riba prijsnan lo nivela, y cu poco poco ciudadanonan lo por ripara esey.
Loke a destaca ta cu a menciona cu tin presion na e departamentonan pa haci inversion. El a sigura cu pa esaki a instrui un comision pa evalua tur deseo di e departamento- y ministernan segun e procedura cu ta habri na januari y tin te dia 31 di maart pa completa esaki. Pa esaki, tin diferente criterio cu ta keda evalua, y depende di e score ta dicidi ki departamento ta esun cu ta ricibi e fondonan.
Tin alrededor di 25 proyecto, cu ta yega na casi 25 miyon florin, y a traves di esaki gobierno a sigura cu nan kier demostra cu e tipo di inversion aki ta importante. “Cu e resultado aki nos kier inverti back den comunidad,” Wever a bisa.
Den nos siguiente edicion, Bon Dia Aruba ta bay amplia riba e resultado y plan pa e otro ministerionan.
