Prome Minister Evelyn Wever-Croes: ‘Ta importante pa Hulanda compronde cu nos ta atendiendo cu un crisis cu nos no a ocasiona’

Ayera y awe, Prome Minister Evelyn Wever-Croes tin varios reunion na Hulanda, unda e topico principal ta Venezuela. Despues di reunionnan na Washington, unda cu Wever-Croes a hiba varios reunion hopi importante tocante e crisis migratorio di Venezuela y e impacto cu esaki tin pa e islanan den nos region mas cerca di Venezuela, e mandatario principal di nos pais ta hibando reunionnan na Hulanda pa trata e mesun topico aki riba nivel di Reino.

Minister Plenipotenciario na Hulanda, Guilffred Besaril a compaña Wever-Croes den e reunionnan na Hulanda.

Dialuna mainta, Wever-Croes a reuni cu Premier Hulandes Mark Rutte. Un bon reunion principalmente pa pon’e na altura di e crisis di Venezuela y e impacto riba Aruba y riba e ceramento di frontera, segun un comunicado di gobierno.

“Mi a describi e retonan cu nos tin awor, y esunnan cu nos tin pa enfrenta. Y mi a bis’e cu comunidad mundial awor mester ‘step up to the plate’ pasobra no ta husto cu nos so mester atende e situacion”.

Tambe Wever-Croes a reuni cu Rutte y Secretario di Estado, Raymond Knops, na unda cu a trata brevemente e tema di finansas publico di Aruba, den e contexto di e impacto di e crisis migratorio di Venezuela.

“Pa mi ta importante pa aki na Hulanda nan compronde cu nos ta atendiendo cu e efectonan di un crisis cu nos no a ocasiona, y cu e tin su consecuencianan pa Aruba. E tabata un bon reunion”, el a enfatisa.

Wever-Croes a reuni tambe cu Milly Schwengle, kende ta miembro di Aruba den Raad van State. Raad van State ta conseha, entre otro, den caso cu tin disputa entre Hulanda y Aruba. “Mi a informa señora Schwengle di e desaroyonan na Aruba, p’asina como miembro di Aruba, e ta bon informa.”

“E impacto di e crisis di Venezuela riba nos pais ta hopi grandi, y ta hopi importante pa Parlamento y Gobierno Hulandes tambe ta na altura di esaki. E crisis di Venezuela no ta un crisis di Venezuela so, of un crisis regional so, e ta un crisis mundial. Aruba y Corsou ta wordo considera como e dos paisnan cu ta wordo afecta mas severamente y sin cu nos ta haya ayudo financiero di ningun banda. Esaki no ta un situacion cu nos a crea, pero nos ta wanta e golpinan si. Ta momento pa Reino y pa comunidad mundial comparti e peso aki y no bira cara y keda sin yuda den e crisis aki,” Wever-Croes a enfatisa.