Ayera mainta durante un conferencia di prensa di prome minister Evelyn Wever-Croes, el a trece dilanti un update tocante situacion di Citgo, mirando e proximidad di fecha 31 di januari, dia riba cual e compania lo stop su funcionnan na Aruba.

Tocante esaki, el a menciona cu negociacionnan ta andando ainda pa nan por haya e yabi di refineria, pa asina nan no por bay cune y pone Aruba den corte pa hopi aña. Asina mes el a bisa cu e negociacionnan ta hopi importante, pa motibo cu Gobierno di Aruba kier yega cu Citgo na un areglo pa e terminacion di un contract, pa por haya e oportunidad pa drenta y drecha loke ta den mal condicion.

Wever-Croes a señala cu e waf tambe a mustra señal di mal condicion. “Mi no sa di na unda nos ta bay haya placa, pero e placa mester bin pa haci inversionnan necesario”, el a sigura. Mientras tanto Refineria di Aruba (RDA), cu ta e compania estatal, a cuminsa prepara na momento cu Citgo bay. No tanto pa refineria pero si pa e terminal, pa motibo cu na februari otro barco ta bin cu gasolin y fuel di afo y e trabounan mester continua, esey ta pa garantisa e suministro.

Den fin di siman tabatin rumor cu gasolin ta caba na Aruba. Wever-Croes a afirma, ‘e suministro local no tabata ni lo bay ta na riesgo den ni un momento’, pa motibo cu nan tin un ‘plan b’. Tocante esaki el a manifesta cu RDA a lanta un compania nobo cu por opera e terminal di energia di Aruba, un compania totalmente estatal cu ta den man di RDA, y RDA ta den man di Gobierno, pa asina por tuma e trabounan over.

Esaki pa motibo cu Citgo a menasa di un momento pa otro pa bay y nan mester tabata cla cu esey, principalmente pa e parti di fuel, Wever-Croes a trece dilanti.

Tocante e trahadonan, unabes cu nan relacion di trabou finalisa cu Citgo nan no lo tin trabou, pero el a manifesta cu nan compromiso ta pa percura pa pronto haya operador nobo cu lo tuma nan over tambe, pa nan no keda mucho tempo sin trabou.

Algun di nan lo wordo tuma den servicio pa e compania akinan pa por garantisa cu e trabounan na e waf ta continua ora cu e barco yega na februari.

Wever-Croes a splica tocante e hefenan di Citgo, comentando cu e leynan y sistema ta pone cu un compania por cera di un dia pa otro, ora cu tin hendenan cu tin cu bay afo y tin cierto motibo pa detene e persona pa no sali for di Aruba. Den e caso aki, esey ta haci cu ya cu no a paga e debe di belasting, den e caso aki, e hefenan di e compania no ta sali via inmigracion. Pero si tin hende cu ta responsabel pa paga belasting y no a cumpli, esey ta un motibo pa detene e persona, pero no e compania.

“Ainda mi tin speransa cu nos ta finalisa e cos aki den un bon forma, sin cu nos mester stroba ni un hende pa bay”, el a sigura.