Durante un conferencia di prensa di ayera diamars den oranan di merdia, prome minister Evelyn Wever-Croes a anuncia cu e mal tempo cu a bin acercando na islanan Aruba, Corsou y Boneiro a desaroya di un manera hopi lihe y te ayera merdia tabatin un Tropical Storm Warning.

Ademas, el a informa cu Crisis Team a wordo activa pa por atende cu esaki.

Di loke ta trata e tormenta, el a bisa cu e velocidad di e mal tempo aki a aumenta di 25 pa 38 kilometer pa ora, esey ta nifica cu lo yega Aruba un poco trempan di loke rapportnan meteorologico tabata mustra.

“E bon noticia ta, cu si e mantene e velocidad aki e ta bay tambe mas trempan”, prome minister a sigura.

Manera a wordo informa dianan pasa, tabata na espera di e mal tempo aki pa awe diaranson den oranan di anochi pero aworaki segun rapportnan rond di 6or di atardi di awe lo por cuminsa sinti e efectonan.

Aworaki Aruba ta den codigo oraño y pa awe merdia nan ta kere cu e lo por cambia pa codigo cora na momento cu e mal tempo lo ta mas cerca.

El a splica cu di e fenomeno aki por espera hopi awasero unda tambe prome minister a pidi pa tur hende ta prepara pa e mal tempo aki cu lo por dura tres dia, sinembargo, e por cambia.

Un otro punto cu ta importante pa destaca ta cu e mal tempo lo pasa na e parti pazuid di Aruba, kiermen entre Aruba cu Venezuela y segun prome minister a indica, “esaki ta un pasada cu nos no ta custuma cune, pues nos lo experiencia otro tipo di resultadonan”.

Nan ta premira cu lama ta bay bira hopi bruto den e oranan dilanti y pa cu esaki nan a emiti un small craft warning unda cu prome minister a haci un apelacion na comunidad y specialmente pa tur piscadonan pa saca nan boto for di lama.

Igualmente, el a menciona cu departamentonan di gobierno mester bay den estado di preparacion di edificionan y departamentonan di gobierno pa e tempestad y awe merdia 12or tur empleado di departamentonan di gobierno lo mester bay cas pa por atende cu esaki na nan cas.

Pa sector priva, doñonan di trabao mes tin cu papia cu nan personal tocante con lo maneha e situacion aki.

No lo tin scol diahuebs y diabierna

Pa loke ta trata scolnan, prome minister a anuncia cu scolnan lo ta cera mañan diahuebs y diabierna, nan a tuma e decision aki pa motibo cu si den caso e tormenta lo pasa diaranson anochi, no lo ta oportuno pa diahuebs mainta hendenan mester ta riba caya pa hiba nan yiu na scol y diabierna tambe debi cu nan no sa con e situacion lo ta e dia aki, tumando na cuenta tambe cu ta fin di aña escolar.

Gobierno di Aruba for di ayera a cuminsa mobilisa tur ekipo di emergencia na nan postnan designa y a pidi pa tur ciudadano tuma e precaucionnan necesario, specialmente pa esnan cu ta biba den cas cu ora awa ta yobe hopi nan ta wordo inunda, “cuminsa regla for di awor caba pa mañan anochi no lo tin cu bay pas’e na cas di famia of conocidonan”, prome minister a expresa.

Extra atencion pa diferente area

Pa esaki, el a declara cu nan ta pone extra atencion pa areanan como Madiki, Pos Chikito, Zeewijk y Palm Beach cu ta e areanan cu usualmente ora tin hopi awasero ta haya hopi molester di awa, den cuadro aki el a pidi extra atencion pa esaki y pa famianan cu por haya incidentenan.

“Situacion ta mustra serio pero e por cambia na caminda, nos mester ta preveni y bon prepara”, el a enfatisa.

Na aña 2016, un otro tormenta a afecta Aruba unda cu area di Palm Beach incluyendo e gasolin station Citgo Palm Beach, e casnan tras di dje y tambe Koyari a wordo afecta basta serio pa motibo cu e dam a pasa over, di esaki reportero di Bon Dia a puntra: DOW a controla e dam di Palm Beach y si nan a haci limpi e rooinan? Marlon Croes director di DOW a contesta cu nan a haci e trabao di haci tur e rooinan limpia na final di luna di mei di e aña aki prome cu temporada di horcan lo yega.

Tambe Croes a menciona cu nan ta vigilando e area aki y tambe nan ta monitoriando e dam, nan lo wak tambe e parti cu nan a drecha recientemente den e caya patras di Citgo Palm Beach unda nan a tira un tuberia den dje cu ta bay pasa te e caminda di Noord Palm Beach pa e por drenta den e back profile grandi cu tin bao di Palma Real y eynan bay den e saliña di Bubali. Asina mes, el a bisa cu nan ta haciendo basta trabao pa engrandece e fluho di awa den e area aki.

Beach y hotelnan

Di loke ta trata e beachnan y area di hotelnan, Rino Harms di Bureau Rampenbestrijding Aruba a señala cu ATA ta den contacto cu hotelnan y igualmente cu Rampen unda nan ta informa den casonan asina pa motibo cu nan ta conoce cu cierto hotelnan na e momento cu tin un tormenta, erosion lo tuma luga, nan a tene un reunion caba pa asina ey informa nan debidamente y kico nan ta espera di e situacion aki unda cu olanan lo por cuminsa subi mas trempan y lo yega prome cu e sistema mes, pa nan por ta prepara mas adelanta.

Mascota

Tambe a puntra si bira ta necesario, si hendenan por hiba nan mascotanan na un shelter. Di esaki Harms a señala cu den e bestrijding plan ta papia di mascota cu tambe mester wordo protegi; y organisacionnan protector di bestia ta sacando posternan riba rednan social cu informacion cu nan aporte durante e mal tempo aki y kico doñonan mes tin cu haci cu nan mascotanan.