Prome Minister Evelyn Wever-Croes tambe a reacciona cu satisfaccion riba e ultimo rapport di CAFT. Den un comunicado di prensa, Wever-Croes a expresa cu segun e reporte di CAFT, entrada y gasto di gobierno ta den linea cu presupuesto 2019 y ta premira cu lo cumpli cu e presupuesto. Pero Wever-Croes tambe a reconoce cu ‘CAFT a duna algun punto di atencion cu lo mester wordo atende den e tempo nos dilanti, y nos ta sigui den deliberacion cu Hulanda riba esaki.
Entre nan ta e pensamento di CAFT cu e Sociaal Crisis Plan no por ta den un presupuesto separa, sinembargo nos Gobierno a yega na otro palabracionnan cu Hulanda, y esaki ta pa registra henter e plan separa di e presupuesto di Gobierno, pasobra ta trata di un crisis plan pa un periodo defini. P’esey e ta separa, pasobra e ta temporal’, el a expresa.
“Mi ta satisfecho cu e relato aki, y cu CAFT ta realisa cu tin trabounan grandi cu a wordo haci caba te cu awor. Ta trabounan hopi grandi di Gobierno, combina cu sacrificionan ainda mas grandi di pueblo di Aruba. Ya caba IMF y Standard & Poors a indica cu Aruba ta financieramente riba bon caminda, e relato di e prome 6 lunanan di aña 2019 cu a wordo presenta na Parlamento, tambe ta indica esey y awor CAFT ta confirma esey – motibo pa ta satisfecho. Cu determinacion nos ta sigui traha pa crea e bienestar y progreso pa tur ciudadano”, Wever-Croes a finalisa den su comunicado.
