Ayera, prome minister Evelyn Wever-Croes tabata presente durante e reapertura di Imelda Kleuterschool. Riba su pagina di Facebook, Gabinete Wever-Croes a mustra un clip den cual prome minister a expresa speransa y positivismo pa cu reapertura di e scol aki.
“Awe ta un dia hopi importante”, Wever-Croes ta expresa. “Tanto pa futuro di Aruba, pa futuro di enseñansa, y e vision di gobierno. Y e ta tipifica tur loke ta bin ta pasando.”
Wever-Croes a continua relatando con e scol aki tabata ‘bandona’ pa hopi aña, y cu gobierno a inverti pa hacie un ‘joya di edificio’. Esaki pasobra e edificio aki ta caminda cu e muchanan ta haya e fundeshi cu lo guia nan pa resto di nan bida. “Pa nos ta hopi importante pa e fundeshi ey ta solido, pa e fundeshi ey ta bon.”
Ademas, Wever-Croes a destaca cu ‘Playa mester di su scol Catolico back’, y e scol aki ta uno grandi. “Mi ta kere den accesibilidad kiermen un mucha mester ta cerca di e scol pa e por yega y haya su enseñansa.” El a destaca cu pa hopi mucha, scol ta bira nan segundo cas, pues ‘ta importante pa e cas aki ta uno agradabel’.
Finalmente, Wever-Croes a resalta e vision di su gabinete pa cu innovacion, destacando cu ‘mas cu mita di muchanan cu ta bay scol awe ta bay traha mañan den trabaonan cu ainda no ta existi’. Pa e motibo aki mester prepara e muchanan pa desaroya habilidadnan digital.
