Ayera mainta a tuma luga un conferencia di prensa di Gobierno di Aruba, den cual Minister Otmar Oduber a haci un anuncio importante pa loke ta trata innovacion y digitalisacion di e departamentonan cu ta cay bou di Ministerio di Infrastructura y Medio Ambiente.

Prome Minister Evelyn Wever-Croes a wordo invita pa Oduber pa ta parti di e anuncio importante aki, como cu e mandatario principal ta e minister encarga cu innovacion y organisacion gubernamental. Na comienso di gobernacion, Wever-Croes a cuminsa traha mesora riba su vision pa innovacion den gobernacion. Un vision cu ta wordo realisa cu stapnan grandi y importante, segun un comunicado di prensa.

“Awe ta un dia grandi. Awe nos ta haci e prome paso pa loke ta vision di digitalisacion di Gabinete Wever-Croes. Den cooperacion di e varios departamentonan bou ministerio di Infrastructura y Medio Ambiente, awe a logra e paso importante aki”, Wever-Croes a expresa.

“Awe ta un ‘milestone’ importante pa locual ta trata nos proyecto di eGovernment. Diferente pasonan significante lo tuma luga den luna di october, entre otro: Comienso di trayecto di digitalisacion di Ministerraad – eCabinet; Ministerio di Husticia tambe pronto lo cuminsa cu digitalisacion; Ministerio di Infrastructura lo cuminsa opera completamente digital; Nos piloto pa cu e infrastructura tecnologico principal pa eGovernment lo cuminsa e luna aki.”

“E proyecto aki ta sumamente importante, Innovacion ta cay bou di encargo di mi ministerio, y den colaboracion cu otro ministerionan y departamentonan nos ta duna realse na nos vision”, Wever-Croes a duna di conoce.

Na Januari di e aña aki Gobierno a cuminsa cu e evaluacion cu ayudo di e-Governance Academy di Estonia pa desaroya un road map cu lo fiha e vision y cuadro di maneho pa cu eGovernment pa Aruba pa termino largo. E fase aki (FASE 1) tabata un trayecto intenso cu awo ta den fase final y ta conta cu apoyo di henter Gobierno, Departamentonan y stakeholders crucial. En total mas cu 120 persona a participa den e evaluacion aki pa yuda defini nos road map.

Den transcurso di e siman aki y otro siman e task forcenan oficial lo wordo formalisa pa asina hunto por bay over na implementacion. Na october e prome proyecto piloto lo cuminsa pa asina desaroya e infrastructura principal, y ta premira cu den 6 luna por termina e test y training di personal pa cu e sistema nobo aki pa e por bay live. Esaki ta 2 luna mas trempan cu a wordo anticipa.

Dia 25 di october nos lo tin un stakeholder meeting unda cu lo presenta e road map y duna un presentacion di e proximo fasenan y con nos ta bay logra e metanan stipula y tambe con sector priva y entrepreneurs por beneficia di eGovernment

“eGovernment tin prioridad halto pa nos gobierno y tin varios proyecto den pipeline caba cu lo percura pa e ciudadano haya un miho servicio y un miho calidad di bida. Na Nacionnan Uni durante siman di Asamblea General, nos a ricibi hopi elogio pa nos vision y plannan di eGovernment y tambe nos a ricibi e compromiso di entre otro UNDP cu nan lo yuda nos cu implementacion di nos plan. Comunidad lo cuminsa ripara mas y mas departamento ta den proceso di digitalisacion. Tur esaki ta parti di e plan integral di eGovernment.

Poco poco nos ta bay ta elimina papel y para den rey pa oranan largo of bay di un oficina di Gobierno pa otro lo pasa pa pasado. Esaki lo duna un empuhe enorme na nos economia y lo trece mas transparencia den gobernacion”, Wever-Croes a termina bisando.

Oduber a duna un presentacion di e proyecto aki na unda cu el a ricibi e prome documento for di Director di DOW, Marlon Croes. Wever-Croes a felicita Oduber cu e prome paso importante aki di digitalisacion di e departamentonan cu ta resorta bou di dje.