Diahuebs 15 di September a tuma luga e reunion publico den Parlamento pa trata e presupuesto di DOW. 12 Parlamentario a vota pa sostene e presupuesto di DOW di e aña aki. Prome Minister Evelyn Wever-Croes a indica cu e presupuesto a yega Parlamento basta laat a consecuencia di e trabounan cu a bin cerca debi na e pandemia. Entre otro tambe tawatin diferente ley cu mester a wordo traha cu a trece tardansa na esaki.

E presupuesto di DOW ta un presupuesto hopi particular. DOW ta haya un suma presupuesta den Presupuesto di Pais Aruba pa traha cu ne. Pero como un compania di Gobierno, DOW mester trece un presupuesto detaya tambe separa.

Prome Minister a duna di conoce cu e aña aki, DOW lo no haya hopi fondo pa motibo cu Gobierno mester a corta tur caminda, tambe na DOW. E presion cu CAFT ta pone cu mester baha salario, goederen en diensten, inversion, ta haci cu mester a corta tambe den e presupuesto di DOW.

Sinembargo, Prome Minister a enfatisa, cu e poco fondo cu DOW tawatin disponibel, DOW a ehecuta diferente Proyecto grandi y cu impacto hopi grandi y positivo. Un ehempel di esaki ta e rotondo na Palm Beach cu a habri durante e siman aki. Tambe DOW a haci trabounan na e beachnan poninedo santo fresco y hacie mas bunita.

Tambe DOW ta haciendo trabounan interno di reorganisacion y automatisacion. Den e reorganisacion lo haci di DOW un departamento cu ta cumpli cu e exigencianan di awendia y cu ta sirbi pais Aruba hopi mas miho. Digitalisacion lo yuda duna miho servicio na cada ciudadano. Ya caba DOW a automatisa un formulario di keho (klachten formulier) cu por ser haya online. Pa medio di esaki, tur ciudadano por expresa nan preocupacion, keho y of deseo. A base di esaki tambe, DOW por haya miho data y informacion pa sa unda lo tin pa pone mas atencion pa asina DOW haci nan trabou mas eficiente cumpliendo asina cu e deseo di e comunidad.

“E presupuesto a worde pasa den Parlmento y DOW cu esaki ta finalisa e trabounan di e aña aki. E Presuesto 2023 lo wordo trata pronto den Paflameno y ta spera cu esaki lo wordo aproba tambe. Goberno tin un trabou grandi pa haci di baha gasto. Esaki ta pa logra trece nos finansas bek na ordo. Lamentablemente, baha gasto kiermeen corta. Ora cu CAFT ta bisa pa baha gasto, hopi hende ta pensa cu ta e ministernan tin gastonan halto. Esaki no ta asina pasobra presupuesto di e ministernan ta hopi chikito. Ta den e departamentonan mester baha gasto, y den esaki, DOW ta un ehempel pasobra ta hopi gasto mester a baha den e departamento aki. Y mi ta hopi orguyoso cu e maneho di DOW, cu poco fondo sinembargo a logra di haci hopi trabou”, Prome Minister Evelyn Wever-Croes a duna di conoce.