Prome Minister Evelyn Wever-Croes: ‘Preparacion si desaster of emergencia yega Aruba’

ORANJESTAD – Diahuebs mainta den un conferencia di prensa, Prome Minister Evelyn Wever-Croes (MEP) a splica tocante e CEDEMA kende ta encarga cu disaster y emergencia den Caribe.

E mandatario a bisa cu e ‘High Level Conference’ cu a ser organisa ta uno importante. Nan a scoge Aruba pa tene e conferencia aki. “E yama 2018 Regional Planetary Security Conference. Esnan cu a organisa ta CEDEMA hunto cu Center for Excellence of Aruba y Reino Hulandes.”

Sinembargo Minister Wever-Croes a bisa como isla, Aruba den Caribe mester ta prepara pa cualkier desaster of emergencia cu lo por bin. El a agrega tambe kico mester di otro islanan pa por ta miho prepara den esaki. E oportunidad aki, segun e mandatario, ta pone Aruba riba mapa internacional cu ta tuma na serio temanan pa locual ta desaster natural, imigratorio y economico.

Ta bon pa ta prepara, asina comunidad ta sinti nan trankil, turistanan/biishitantenan por sigui bin Aruba. Tres punto cu a duna importancia, e mandatario a splica, ta dependiente di energia. “Mirando cu Aruba ta un isla chikito, si un desaster natural mester pasa, e ta afecta energia. Pa nos ta mas fuerte y miho prepara, ta importante paso e prijs mundial cuminsa subi. Anto si depende di otro paisnan grandi, ta haci impactodirecto na nos pais. Ta haciendo esfuerzo posible pa nos baha dependencia di heavy fuel oil y pa reemplasa ekipo cu ta mas eficiente. Por mira energía manera parke di Molina di Biento, parke solar, entre otro”, e mandatario a splica.

E punto ta cu Aruba ta un isla cu ta depende di awa, Prome Minister Wever-Croes a bisa. Si algo pasa cu e awa dushi, e ta un problema serio, pero e ta bisa cu orguyo di WEB pa 85 aña ta prepara e awa destila cu ta un di miho calidad rond di mundo. Segun e mandatario, e compania di awa tin biaha tin demanda halto pa distribui y traha e awa cu tin mester den comunidad di Aruba, sin mira cu algo por bay malo; un experiencia cu por comparti cu otro islanan.

E di tres parti ta esun di ‘Food Security.’ Wever-Croes ta remarca cu Aruba ta depende di importacion di ‘practicamente tur alimento pa nos y pa parti turistico.’ Si algo mester pasa cu barco no por yega Aruba, lo ta un problema.

Prome Minister Wever-Croes a bisa cu, como gobierno, ta prioridad pa no depende di un solo fuente of e fuentenan principal si yega un punto cu no tin cuminda. “Na comineso di aña con esey a causa panico pa nos atende cu tema di food security.”

Colega di prensa a puntra cua ta e miho opcion den e parti di cuminda, na loke e mandatario a contesta cu mester planta producto manera verdura y fruta. No ta tur ora ta fácil, pa motibo cu Aruba ta seco, pero por logra pa haci esaki.