Dialuna durante reunion publico, Parlamentario Edgard Vrolijk a presenta un contracto laboral na unda cu ta indica cu Richard Arends a wordo nombra como Director Financiero di RdA. E informacion aki, Prome Minister Evelyn Wever-Croes a expresa cu a sorprende pasobra den pasado Arends, a nenga y a bisa cu esaki no ta berdad.
Segun e comunicado cu Bon Dia Aruba a ricibi ta indica cu “Mi ta corda cu un tempo pasa esaki a wordo treci padilanti, pero Arends a nenga categoricamente. Awor Arends a cuminsa cambia su storia y a admiti cu el a firma e contract pero cu nunca el a cobra. Y a bisa tambe cu el a entrega su retiro. Si ta asina mi ta pidi Arends pa e mustra nos su carta di retiro. Pasobra ami no por haya su carta di retiro y Director di RdA tampoco a haya su carta di retiro”, Prome Minister a duna di conoce.
Segun Prome Minister, e Director di RdA a inform’e cu e no tabata sa di e contracto laboral tampoco. Pues awor ta Richard Arends mester bin padilanti y mustra cu locual cu Parlamentario Edgard Vrolijk a trece padilanti, no ta corecto.
“Ami no por pone presion riba Richard Arends pa e haci lo corecto, esey ta algo cu e mes of Parlamento mester haci. E por dicidi di keda sin bin cu e prueba, y pasa pa historia como un otro politico di AVP haragan y literalmente sin ningun berguensa, pero conociendo Arends, mi ta duda cu e lo laga esey pasa”.
Prome Minister ta lamenta cu Arends no ta apareciendo den Parlamento. Ya ta di dos dia cu ta tin reunion publico den Parlamento y Arends no ta biniendo trabou. Si por nota cu Arends ta comunica via Facebook e ta comunica.
Prome Minister a urgi Richards Arends pa e stop di sapatia y tira lodo riba otro hende pasobra esaki no ta coregi su eror. Loke cu Richard Arends mester haci ta presenta su prueba y haci lo corecto y tuma ehempel di Parlamentario SueAnn Ras, kende pa algo hopi menos serio, a tuma su retiro.
“Loke Richard Arends a haci ta algo hopi serio. Exigi salarionan y condicionnan di trabou asina exorbitante for di companianan estatal, ta un eror y un abuso grandi. Sigur sabiendo cu Gobierno y pueblo tin mester di e placa ey. Arends a admiti cu el a comete e abuso ey cu su firma riba e contract. Awor e mester haci lo corecto. Richard Arends, admiti bo eror y tuma bo retiro”, Prome Minister Evelyn Wever-Croes a enfatisa.
