Diabierna ultimo den un Renaissance Conference Center yen, 35 ciudadano di pais Aruba a ricibi nan condecoracion real. Ta trata di ciudadanonan cu banda di nan trabou a haci cosnan excepcional completamente boluntario. Personanan cu a wordo condecora a base di labornan excepcional riba diferente tereno, entre otro: humanitario, conserva medio ambiente, nos flora y fauna, turismo, nos hobennan, cultura, arte, musica, deporte, padvinder, y trabounan caricativo a traves di misa y iglesia.
“Ta prome biaha cu 35 ciudadano ta ricibi un condecoracion real parew na Aruba. Otro añanan ta rond of menos di 10. Mi ta hopi contento y orguyoso di tur e ciudadanonan aki pa e bunita trabou cu nan a y ta haci den nos comunidad. Gobernador a para keto na e labornan di cada persona, durante un ceremonia hopi bunita.
Mi sa cu tin hopi mas ciudadano cu merece e condecoracion real. P’esey como Gobierno nos ta haci nos maximo esfuerso pa duna informacion pa ciudadanonan di Aruba manda mas tanto posibel proposicionnan pa e comision di Hulanda cu tin cu dicidi.
Pa un persona por bin na remarke pa un condecoracion, mester ta trata di un persona cu aparte di su trabou a of ta dedica su mes na labornan excepcional boluntario, “Minister President Evelyn Wever-Croes a duna di conoce.
Prome Minister a felicita tur 35 ciudadano cu a ricibi condecoracion real e aña aki y a expresa su deseo pa e siguiente aña atrobe nos por mira asina hopi ciudadano ricibi un condecoracion real.
