Den un prome conferencia di prensa di pa loke ta trata aña 2023, prome minister Evelyn Wever-Croes a papia riba diferente puntonan cu a wordo treci dilanti durante su biahe na Sint Maarten den cual otro mandatarionan di Reino tambe tabata presente.

Manera a anuncia dianan pasa, Caribisch Orgaan voor Hervorming en Ontwikkeling miho conoci como COHO, un organo consisti di 3 persona apunta pa gobierno Hulandes, no ta bin mas y na su luga ta bini un “onderlinge regeling”, un acuerdo cu ta respeta e posicion autonomo den e pais.

El a menciona cu den e acuerdo aki, Aruba mes ta esun cu ta bay determina kico ta e decisionnan cu mester tuma pa un miho futuro di e pais. Cu esaki a logra dos cos importante por ehemplo, no ta bin un ley di Reino, esta un rijkswet, y e organo COHO no lo bin mas tampoco.

Di mesun manera el a splica e caminda na unda Aruba ta para na e momentonan aki unda cu na luna di maart di 2020 mundo financiero a cuminsa cera porta pa fiansa pa via di e casonan di pandemia Covid-19. Esaki a premira un efecto devastador di Covid pa Aruba, cual a resulta di tabata asina tambe. Na e momento ey e unico alternativa tabata pa bati na porta di Hulanda.

Pa dos luna Hulanda a presta Aruba placa, bou varios condicion (por ehempel recorte di salario di empleado publico cu 12.6%, recorte di salario di minister y parlamentario cu 25%, recorte di gasto di AZV cu 60.000.000 miyon florin, implementa un norma maximo pa salario di directornan di compania estatal, etc). No tabata tin otro alternativa cu djis acepta esaki, pasobra tabata tin mester di e placa pa yuda sector priva pa no retira tur empleado, pa yuda esunnan cu a perde trabou, pa cubri e gastonan gigantesco di e pandemia y pa sigui goberna e pais.

Sinembargo na fin di juni 2020 a bin cu un condicion Caribisch Hervormings Orgaan (CHE) cu despues a bira Caribisch Orgaan voor Hervorming en Ontwikkeling (COHO): pa 6 aña un organo consistiendo di 3 persona apunta pa gobierno Hulandes, lo determina con Aruba, Corsou y Sint Maarten, mester implementa reforma y a cambio Hulanda lo presta placa cu mester, pa por sobrevivi durante di pandemia.

Na e momento ey, Aruba despues di consulta varios biaha cu tur stakeholders, a indica di no por acepta e condicion di CHE/COHO. A negocia intensamente pa algun luna largo, a pesar cu mas y mas gremio na Aruba a pidi pa firma lihe unda Prome Minister mester a bay Hulanda durante e pik di e pandemia pa delibera cu Gobierno Hulandes.

Tabata bou di hopi presion y di un negociacion basta intenso cu Aruba a acepta e condicion mirando e necesidad y mirando cu Gobierno di Hulanda no kier a haci mas cambio, dia 13 di november 2020, a firma un acuerdo pa ehecuta e reformanan den e Landspakket, cual ta reformanan cu pa 80% Aruba mes a propone, segun a sigura y cu lo traha riba un ley di consenso di Reino COHO.

Na aña 2021 e ley a wordo presenta na Parlamentonan di Aruba, Corsou, Sint Maarten y Hulanda, unda tur 4 parlamento tabata tin hopi critico riba e forma con Hulanda a impone e condicion aki y riba e contenido di e condicion.

Basa riba e critica aki, na juni 2022 Gobierno di Aruba a presenta un alternativa: un areglo mutuo (“onderlinge regeling”) en bes di COHO y elimina tur e condicionnan. Un onderlinge regeling cu ta duna realse na e autonomia di e paisnan y e responsabilidad cu e gobierno di e pais tin di carga.

Den e reunion di Reino di juni 2022 cu a tuma luga na Aruba, a keda dicidi cu Aruba, Corsou y Sint Maarten lo prepara e areglo nobo basa riba e alternativa presenta pa Gobierno di Aruba, caminda sigui negocia cu Hulanda y durante e reunion di Reino di 12 y 13 di januari 2023 na Sint Maarten, a yega na acuerdo cu tur cuater pais ta sostene e Onderlinge Regeling.

“Un areglo cu ta respeta e posicion autonomo di cada pais, den cual no tres persona Hulandes lo determina kico ta miho pa futuro pa nos pais, pero nos mes. Un areglo cu ta basa riba cooperacion y traha hunto, en bes di sancion ora no cumpli y principalmente ta un areglo cu ta respeta e posicion di nos parlamentonan”, Prome Minister a sigura.

E reforma y Landspakket ta sigui, pero e forma con ta ehecuta e Landspakket cu ta monitoria y cu ta actua, esey ta den nos man manera cu e tabata den e dos aña aki entre TVO di Aruba y di Hulanda.

Di loke ta trata e beneficio di e onderlinge regeling, el a splica cu un di nan ta ownership, responsabilidad y duna cuenta unda cu esaki ta mas cla ken ta e responsabel pa ehecucion di reformanan, ken tin cu duna cuenta y na ken.

“Esaki no tabata asina ora COHO tabata riba mesa, pasobra e organo COHO cu e tres persona no mester a duna cuenta na ningun hende. Talbes nan mester duna cuenta na Hulanda pero na nos no y ta aya unda lo a dicidi tur cos. Awor cu ta un onderlinge regeling cu encera ownership, responsabilidad y duna cuenta, tur lo pasa akinan na Aruba,” el a bisa.

Den e base legal, e onderlinge regeling “ta cuadra mas cu e framework di Aruba, contrario na esun di COHO”, segun Prome Minister a sigura, “e lo a kibra e principionan democratico di e pais.” Parlamento ta mantene espacio y e derechonan cu nan tin den representacion di pueblo como co-legislado y den nan funcion pa controla gobierno, nan ta wordo mara na acepta ley di maneho di antemano manera tabata e caso cu un rijskwet: “pueblo tambe por vocifera su mes por medio di un eleccion por ehemplo, sin cu politico Den Haag por forsa Aruba pa ehecuta e plannan manera cu nan tabatin e poder pa haci hasta si pueblo no ta di acuerdo y gobierno por fiha su propio prioridadnan”, Prome minister a declara.

Den e rijskwet di COHO, CAft lo a haya un rol mucho mas extenso y lo a mester supervisa tambe con e reformanan tabata wordo ehecuta: “esaki tabata un di e medidanan draconico cu nos a mira cu nan por a bay aplica den caso cu CAft ta haya cu un pais no ta implementando reformanan mucho lihe. CAft tin un trayecto pa cana pa loke ta supervision financiero pero e COHO lo a dun’e mas caminda pa cana, e ta sigui existi pa supervision financiero”, el a afirma.