ORANJESTAD – E veredicto di siman pasa di e caso di un ex-minister di AVP cu ta trata di corupcion durante su periodo como minister, ta keda marca como un pagina scur den historia politico di Aruba.
Segun un comunicado di gobierno, esaki ta di dos biaha cu Aruba como pais ta wordo confronta cu un ex minister ta wordo haya culpabel di actonan di corupcion durante e periodo cu nan tabata minister. Tur dos ex minister ta bin di e partido di AVP. Esaki, Prome Minister Evelyn Wever-Croes a indica cu ta concerni nos tur y ta un berguensa grandi pa nos pais.
“Como ciudadanonan cu ta stima nos pais, nos no kier wak e cosnan aki pasa. y awo mas cu nunca, e compromiso mester t’ey di nos tur pa cosnan asina no pasa mas den futuro”.
Gobierno di Aruba ta haciendo tur esfuerso riba e tereno di integridad pa asina percura pa cosnan asina no pasa mas y evita e berguensa cu corupcion ta causa nos pais.
E prome fase ta e Bureau Integriteit, Oficina di Integridad cu Gobierno a institui y na october di aña pasa a nombra señora Amalin Flanegin pa setup e departamento aki y cu lo mester keda cla pa cuminsamento di mei. E vacatura pa e director pa e oficina aki a sali den medionan di comunicacion. E deadline tabata siman pasa na unda cu a ricibi varios personanan kendenan a aplica.
Pa esaki keda neutral y mas leu posibel di politica, Wever-Croes a enfatisa cu e mes no ta envolvi den e seleccion di e director di e departamento. E comision, cu ta consisti di entre otro; Siguridad Nacional, Procurador General, di Centrale Accountantdienst; ta encarga pa selecta e miho cantidato pa director di e departamento di Integridad. E oficina ya caba ta wordo prepara tambe pa asina cu punta e director y esunnan cu lo bay traha pa e departamento aki, e prome notificacionnan por drenta. E oficina di Integridad ta bay enfoca mas riba prevencion y duna informacion di pakico cosnan no por bay mas manera nan tabata bay pa asina evita kiebro di integridad.
E di dos fase ta e Integriteitskamer, Camara di Integridad. Mientras cu e Oficina di Integridad ta bay concentra su mes den e aparato gubernamental, di minister te na ambtenaar, Camara di Integridad ta bay repasa, revisa decisionnan grandi di Gobierno den porehempel destaho publico, si esaki a bay segun reglanan di integridad.
Pa e Camara di Integridad, Gobierno actualmente ta den combersacionnan cu Raad van Advies y cu un comision cu Prome Minister a institui, ‘Comissie Versterking Democratisch Bestel pa asina avansa pa e Camara di Integridad keda cla mas lihe posibel. E meta ta pa esaki keda cla e aña aki.
E di tres fase ta e ‘Corporate Governance Code’ pa asina nos companianan estatal ta mara tambe na reglanan mas estricto y uniforme. Actualmente e reglanan aplicabel ta depende di cada statuut di cada compania estatal. Wever-Croes a indica cu no por garantisa cu e ‘Corporate Governance Code’ ta keda cla e aña aki ainda, pa motibo cu kier concentra riba Oficina di Integridad y Camara di Integridad pa despues sigui cu ‘Corporate Governance Code’ cu pa otro aña si lo mester keda cla. Unabes cu e tres institutonan aki ta na luga, Wever-Croes a duna di conoce, cu e ora nos por ratifica e tratado di Nacionnan Uni pa combati corupcion poniendo asina cu Aruba tambe ta un di e paisnan rond mundo cu ta cumpli cu esaki.
“Pa Gabinete Wever-Croes, e parti aki di integridad ta importante pero no ta facil. E ta pone e midimento na nos Gobierno hopi mas halto cu den pasado. Sinembargo, nos ta haci’e pasobra Aruba merece di tin confiansa bek den su Gobierno. Y sin integridad, no tin confiansa cu e comunidad mester tin den su gobierno”, Wever-Croes a termina ta bisa.
