Ayera den conferencia di prensa di Gobierno di Aruba, prome minister Evelyn Wever-Croes a trece dilanti cu e situacion tocante pandemia Covid-19 ta uno preocupante na unda nan ta mira cu den dianan aki e cifranan ta hopi halto aunke e variante Omicron no ta uno peligroso compara cu Delta.

El a menciona cu tur e medidanan aplica den pasado no por ser aplica atrobe “e ta pone cu nos mester e balans constantemente”, el a sigura.

Tocante e cifranan di casonan nobo registra ayera 05 di januari, Departamento di Salud Publico a indica cu tabatin 1.162 caso nobo na unda cu te awor tin 3.730 caso activo.

Grado di hospitalisacion a mustra cu den e olanan anterior e datonan ta diferente unda cu na luna di augustus di aña 2020 pashentnan na hospital a subi y a implementa e medida di toque de queda pa motibo cu hospital a bati alarma, na e momento ey mester a tuma decisionnan urgente “nos no tabata kier pa e momento ey, ni un hende haya un accidente di auto, ni haya un otro trauma cu mester a bay intensive care, pasobra intensive care tabata hopi yen na e tempo ey”, prome minister a bisa.

Aworaki Aruba ta den e ola cinco y manera el a sigura, e caminda na unda Aruba ta para awor no ta hustifica medidanan drastico manera toque de queda como esunnan cu mester a tuma na augustus di 2020, el a bisa cu ta importante pa informa cu awe tin 21 persona na hospital, 3 na intensive care y 18 riba piso general.

“Nos capacidad na hospital, ta ok, ta bao di control y esey ta nos compas, esey ta e guia basa riba e conseho di nos expertonan di ki ora nos mester bin cu medidanan mas drastico”, el a declara.

Scolnan lo por haya mas protocol di proteccion

Pa loke ta trata enseñansa, prome minister a comenta cu nan a tuma e decision pa atende e tema di enseñansa den otro forma, siman pasa nan a pidi CrisisTeam pa pone atencion riba e sector aki unda cu nan dicidi warda te ayera pa nan por tuma e decisionnan basa riba datonan y consehonan, el a expresa cu nan a tuma e decision di habri scolnan dialuna 10 di januari pa motibo cu nan kier evita aglomeracion den edadnan mas hoben te esunnan mas grandi unda cu e grupo aki no ta vacuna.

Nan a tuma e decision basa riba e cantidad di casonan di diamars ultimo unda a reporta 1.028 caso nobo y tambe di informacion cu nan ta haya di scolnan cu nan directiva unda varios docente, mayornan y alumnonan ta den isolacion y cuarentena cu ta haci cu scolnan mes lo ta bashi e dia di awe of ta bay tin falta di docente na unda lo crea otro tipo di reto pa scolnan.

Tambe, el a menciona cu den dianan aki cu no lo tin scol ta bon pa prepara e protocolnan nobo cu ora scolnan habri mester ta in place caminda cu e proyeccion pa dialuna ta cu pa dialuna e mayoria di esnan den cuarentena of isolacion lo sali.

Tocante esaki, nan ta evaluando pa haci cambio den protocol di scolnan na unda cu entre ayera y dia di awe e notificacion lo bay na scolnan pa asina ey den dianan aki nan lo por haci e cambionan, “scolnan keda pendiente cu a traves di cluster nan lo wordo informa di esaki cu lo ta probablemente mas medidanan di bescherming di loke tin aworaki caba”, prome minister a declara.

P’esey nan a pidi scolnan mas datonan pa mañan diabierna pa di e forma ey nan como directiva y asina tambe gobierno conhuntamente cu CrisisTeam por analisa e datonan ey pa evalua si e situacion a mehora, a keda mescos of a empeora.

Asina mes, el a sigura cu algun scolnan a pidi pa cuminsa awe 06 di januari na unda cu nan ta scolnan relativamente chikito cu tin tur procedura in place y nan por handle e situacion cu docentenan y alumnonan presente, nan a haya e aprobacion pa cuminsa segun loke prome minister a señala.

Bon Dia Aruba a dirigi na prome minister e pregunta cu aunke scolnan lo no cuminsa awe pa motibo cu lo presenta aglomeracion y tin mas di 3.000 caso activo, si lo ta posibel pa implementa lesnan online ya cu for di comienso di pandemia esey a wordo implementa y na e momento ey no tabatin asina tanto caso manera aworaki, el a contesta cu “e decision pa pospone apertura di scol ta pa nan por haya mas dato, esey ta un di e tareanan cu directivanan di scol tin den e dos dia aki ta busca e datonan, tuma contacto cu docentenan di manera mas intensivo igualmente cu alumnonan pa nan mira si pa dialuna tur cos ta cla pa scolnan habri”.

Asina mes, el a afirma cu manera cu scolnan ta premira y nan ta indicando, scolnan por habri dialuna manera tabata planea, pa loke ta trata dunamento di les virtual, prome minister a enfatisa cu esey a bay bon den poco scolnan, “den e mayoria di scolnan tabatin hopi reto, e retonan tin di haber cu falta di infrastructura, falta di preparacion y falta di finansas, lamentablemente e retonan aki no por a wordo adresa completamente debi na falta di finansas, kiermen nos no tin e solucion ainda pa bay over na lesnan virtual cu por bira un solucion pa e situacion cu nos ta aden pero, nos ta evaluando stap pa stap, hopi scol a avansa si acaso mester yega asina leu, na unda cu nos no a bay tampoco pa loke trahamento den oficinanan pa baha e cantidad di personanan den oficina y e ora ey nos mester aplica paralelo pero nos no a yega asina leu ainda”, el a finalisa.