Diaranson mainta, Prome Minister Evelyn Wever-Croes tabata presente na e prome San Nicolas Business Summit, organisa pa San Nicolas Business Association (SNBA) na unda cu Wever-Croes a entrega un discurso hopi elabora di e vision cu su gabinete tin pa San Nicolas.
“Den e vision di nos gobierno, nos ta pone e ser humano central, nos ta aplica un ‘Human Centred Approach’, den cual nos no kier laga ningun hende keda atras. Para aki, den curason di San Nicolas, realmente e concepto di pone e ser humano central ta bin padilanti”, Wever-Croes a expresa na apertura di su discurso, segun un comunicado di gobierno.
El a duna di conoce cu pa demasiado tempo San Nicolas no a mira e mesun desaroyo cu e resto di nos pais. Pa genera e desaroyo den San Nicolas, Gabinete Wever-Croes a institui e plataforma AREA, di cual ta fungi e Director Eugene Wilson, kende ta tabata presente tambe na evento.
E meta di AREA ta pa trece stakeholders hunto y crea un vision con pa hiba un centro di ciudad padilanti. “Nos a cuminsa cu crea dos taskforce. Un pa Playa y un pa San Nicolas. SNBA tambe ta participa na e taskforce aki. E intencion ta pa crea Taskforce pa demas ciudadnan na Aruba, pa crea desaroyo.”
Segun e comunicado, mesora e taskforce di San Nicolas a cuminsa ‘cu hopi entusiasmo’. E taskforce di AREA San Nicolas ta consisti di un grupo di comerciante di San Nicolas, cu boluntariamente a duna nan tempo liber y nan recursonan pa yuda sondea e necesidadnan den centro di San Nicolas, y con pa trece bida bek den centro di ciudad.
Den poco tempo e plataforma di Area a logra crea momentum y catalisa colaboracion entre instancianan manera SNBA, entre departamentonan di gobierno, stakeholders y cu awe nos por mira cu e Oficina di Turismo a habri bek, cu obra di arte di Changa a wordo inaugura, a organisa evento pa comunidad, entre otro e ‘open air movie night’, y pronto lo resolve e tema di wifi den caya grandi. Y cu hopi alegria nos a mira cu Minister di Turismo a trece Island Fest na San Nicolas, y nos a mira sector priva cuminsa demostra e confiansa bek den San Nicolas ora cu teatro Principal habri su portanan bek, e comunicado ta continua.
“Mi deseo ta pa hunto nos traha den e direccion pa crea oportunidad na San Nicolas, pero specialmente PA San Nicolas. Mi ta invita boso pa hunto nos crea un miho Aruba, cuminsando na San Nicolas”, Wever-Croes a expresa.
Presente na e San Nicolas Business Summit, organisa pa San Nicolas Business Association (SNBA), tabata Su Excelencia Gobernador Alfonso Boekhoudt, Presidente di Parlamento Ady Thijsen, Minister y Parlamentarionan.
