Durante tratamento apertura di frontera cu Venezuela den Parlamento, Prome Minister Evelyn Wever-Croes a trece preocupacion di DVG dilanti. E preocupacion ta encera e presion financiero cu ta bin riba AZV, cual ta importante pa Parlamento tene cuenta cune.
Un aspecto cu a wordo pidi di parti DVG na gobierno pa tene cuenta cune den e decision pa habri frontera of no, ta encera e impacto cu esaki lo por tin riba fondo di salubridad.
DVG a indica cu na e momentonan aki tin situacion cu dokternan ta duna consulta na personanan cu no ta documenta y cu no tin AZV, y cu nan ta keda cu cuentanan di 200 pa 300 mil florin pa luna cu no ta wordo paga. Na fin di dia gobierno tin cu paga esey, pues ta papiando di hopi placa, Prome Minister a expresa.
Banda di esaki, Prome Minister Wever-Croes a informa na Parlamento cu tin presion cu ta bin di organisacionnan internacional, pa Aruba duna e refugiadonan e status bou di AZV, pa cual Prome Minister a indica cu esaki no ta e momento pa haci esaki. “Parlamento mes ta testigo di con ta luchando cu AZV y con mester a tuma cierto decisionnan no-popular pa purba rescata e fondo.”
Si haci esaki, no por garantisa cu e fondo tey ni pa e grupo di persona aki y ni pa otro hende, Prome Minister a termina bisando.
