Ayera nochi, pa alrededor di 9pm, Prome Minister Evelyn Wever-Croes a haci un transmision en bibo for di sede di MEP. Rondona pa casi henter e seno di partido, Wever-Croes a dirigi su mes na pueblo di Aruba, memey di e conflicto entre e dos partido di coalicion relaciona cu e voto pa presidente di Parlamento awe dialuna.
Mientras cu e no a comenta tocante e situacion den coalicion, bisando cu lo duna mas declaracion tocante esaki “despues di papia cu nos partner den coalicion,” si el a bisa cu ta reitera e compromiso “di nos cada un” na partido MEP. El a bisa cu MEP ta “un partido prestigioso, un partido cu a demostra cu por goberna e pais aki den bon tempo, den mal tempo y den hopi mal tempo tambe.”
Loke mas a hala atencion di e declaracion di prome minister tabata e momento unda el a bisa: “Un partido cu ta preparando pa algun luna caba pa eleccion cu ta bin nos dilanti.”
El a finalisa e video cortico bisando “Partido Movemento Electoral di Pueblo ta cla pa eleccion.”
Ursell Arends: “Nos a pidi MEP pa nomina ken cu ta di MEP, cu no ta Edgard Vrolijk”
Algun minuut despues, vice-prome minister y lider di partido Raiz, Ursell Arends a tene su propio conferencia di prensa na sede di partido Raiz hunto cu e miembronan di su partido.
“E motibo pakico nos ta akinan awe ta pa motibo di leadership style y tambe imparcialidad di voorzitter di Parlamento,” Arends a cuminsa bisando, agregando cu “mas cu mita di Parlamentario a expresa esaki y anos no ta bay den discusion di esaki. P’esey mes nos a acerca nos partner den coalicion y bisa nan cu nos ta kere cu ta momento pa nan draag voor un otro candidato, y Raiz – nos parlamentarionan lo sostene esaki.”
Comentando cu como partido ta “tuma nos responsabilidad na serio,” Arends a bisa cu ta trahando pa bienestar di Aruba y “mi ta kere ta importante tambe pa bisa cu na ningun momento Raiz kier kibra e acuerdo di gobernacion.”
El a bisa cu segun acuerdo di gobernacion, MEP tin e presidencia, pero pa motibo di estilo di liderazgo y imparcialidad a pidi e partner den coalicion pa presenta otro nomber pa e parlamentarionan di Raiz por sostene e nominado, reiterando cu no lo sostene Edgard Vrolijk.
“Mi ta sigur cu ni MEP, ni Raiz, ni pueblo di Aruba kier un eleccion na e momento aki,” Arends a agrega. “Pero si eleccion bin mañan, nos ta cla pa eleccion tambe.”
