Aruba ta den pleno desaroyo. Nos Turismo a yega nivelnan di prome cu pandemia, y lo sigui crece. Nos Economia lo yega 100% recuperacion otro aña. Aparte di esey, nos a logra un surplus financiero pa 2023. Tur esaki ta danki na e trabou duro di nos ciudadanonan.
Den e proceso di recuperacion nos ta pone atencion tambe na integridad. Pasobra e unico forma cu nos pais por recupera, ta si nos recupera cu integridad. Corupcion y violacion di integridad ta kibra e confiansa cu pueblo mester tin den su gobierno y den su politiconan. Ademas corupcion y kiebro di integridad ta costa hopi placa di nos pueblo pa enrikese un otro inhustamente.
Ta p’esey den e fase di recuperacion mester pone debido atencion na e tema aki.
E esfuersonan di minister Ursell Arends den e aña aki ta pasonan grandi construyendo e fundeshi di integridad pa Aruba. Mientras cu casonan di corupcion ta sigui lanta cabes rond mundo, ta importante pa tin bon mecanismonan di control pa detecta y coregi e rumbo mesora, como tambe pa investiga y denuncia cu tur transparencia. Esey ta loke Gabinete Wever-Croes 2 ta para p’e. Pasobra pa Aruba recupera realmente, mester ta a base di integridad.
