Proyecto di Hotel Secrets Baby Beach Aruba lo trece hopi desaroyo pa San Nicolas y henter Aruba

Prome Minister Evelyn Wever-Croes a tene un conferencia di prensa den cual a trata e ultimo desaroyonan andando cu e hotel Secrets Baby Beach Aruba.

A pesar cu e permiso di construccion y tur e permisonan relevante a wordo otorga na e desaroyadornan legalmente, tabatin un promedio di 20 caso den corte den cual a ‘toets’ esaki. E ley cu ta stipula construccion di e hotel ta e Plan di Desaroyo Teritorial / Ruimtelijk ontwikkelingsplan met voorschriften (ROPV) den cual ta indica cu e construccion por tuma luga na e sitio unda cu e ta tumando luga.

Prome Minister Wever-Croes a splica cu e permisonan pa construccion di e hotel a wordo entrega durante periodo di gobernacion cu ex-Minister Otmar Oduber tabata Minister. Sinembargo na numeroso ocasion gruponan den comunidad a entama caso den corte contra e construccion di e hotel. Algun dia pasa tabatin un veredicto den corte cu a wordo entama pa un grupo di habitantenan. Den e caso aki, pa prome biaha hues a tuma e decision pa pospone e proyecto ‘Schorsende werking’ pa e hecho cu habitantenan tin un obhecion entrega.

Gobierno di Aruba no ta di acuerdo cu e veredicto aki y ta convenci cu e interpretacion duna no ta uno corecto. Pues a apela esaki y ta spera cu dentro di poco por tin un decision riba e apelacion aki. Banda di esey Prome Minister a indica cu tin mas caso andando den corte, pues ta pendiente di e finalisacion di tur e casonan aki.

Gabinete Wever-Croes ta kere den San Nicolas

Gobierno di Aruba ta kere den e desaroyo di San Nicolas y pesey Gabinete Wever-Croes I a duna e permisonan relevante na e hotel aki. Den e leynan di ROPV a tene cuenta cu e tipo di desaroyo aki y ta convenci cu tin hopi potencial y oportunidad di crecemento pa Aruba na San Nicolas.

Minister di Turismo Dangui Oduber ta invertiendo den e potencial turistico, door di diferente proyecto di embeyecemento di Baby Beach, Rodgers Beach etc. Minister di Energia Glenbert Croes su enfoke ta riba crea den San Nicolas un area di industria energetico. Minister di Economia Geoffrey Wever ta invertiendo hopi tempo y atencion na embeyecimento di areanan na San Nicolas pa atrae otro sorto di desaroyo. Esakinan ta algun ehempel di con gobierno ta sostene desaroyo na y ta crea den e potencial di San Nicolas.

Finalisando, Prome Minister a pidi e comunidad cu ta den espera di e hotel pa tene un poco pasenshi mientras cu ta atende cu e casonan den corte. E proyecto di Secrets ta un proyecto hopi importante pa pais Aruba, respetando derecho di tur habitante. Sinembargo tin cierto limite ora cu tin cu tuma decision den bienestar di henter un pais. Tin hopi mama y tata di famia cu ta biba na San Nicolas y cu ta traha den sector hotelero cu mester tuma varios bus pa yega trabou. Hustamente e mama y tata di famianan aki ta esunnan emociona cu e proyecto di hotel na San Nicolas cu ta duna preferencia na esunnan cu ta biba pariba di brug.

Gobierno ta convenci cu e proyecto di Secrets hotel lo trece hopi desaroyo no solamente pa San Nicolas so, pero pa henter Aruba, Prome Minister a termina bisando.