Den e reunion publico den Parlamento diahuebs ultimo pa presenta e Programa di Gobernacion 2021-2025, Aruba Mester Di Nos Tur, Prome Minsiter a cuminsa pa enfatisa e importancia pa fortifica nos estado di derecho. “E colegionan halto di estado di nos pais mester wordo fortifica mas ainda pa asina nan por cumpli cu nan tarea y unda mester wordo independisa mas”.

Prome Minister a duna di conoce cu Gobierno kier logra pa e sistema di check and balances keda manera cu e tabata e ultimo 4 añanan, e wordo fortifica y e por sigui pa generacionnan cu tin cu bin. “Di e manera aki, nos furuto generacionnan lo no pasa den situacionnan cu nos a mira durante e 8 añanan di gobernacion di señor Eman cu a desactiva e forsa cu tabata tin den nos colegionan halto di estado”.

Pa loke ta traha Ombudsman, Prome Minister a enfatisa cu su ministerio lo duna tur sosten na e aspectonan legislativo pa esaki wordo finalisa. Tambe e relacion den REino y den exterior tambe ta un punto hopi importante y ta dirigi riba crea oportunidadnan nobo den Reino y tambe internacional dirigi riba recuperacion di nos pais.

Innovacion, Prome Minister a accentua, ta un medio pa bo logra bo metanan den gobernacion y mehora calidad di bida di bo ciudadanonan. e-Government, cu ta den e e-Government Roadmap 2021-2025, “A better citizen experience”, lo ta enfoca pa mehora y digilisa e servicionan di Gobierno pa tin un miho calidad di bida pa ciudadanonan.

Tambe lo sigui ehecuta e proyecto di desaroyo y enfoca riba e 21st Century Skills pa por introduci e-Learning, desaroyo di programanan di educacion profesional specialmente riba tereno di IT management y cyber security.

Pa loke ta organisacion di Gobierno, lo enfoca riba sector publico pa e por bira uno agil y confiabel y cu ta duna servicio di balor agrega na comunidad. Hisa e efectividad di sector publico door di brinda servicio mas rapido y menos burocracia, dunando e sosten caminda cu mester. Tambe pa sigura e integridad y transparencia den tur e procesonan gubernamental.

Pa loke ta infrastructura y desaroyo teritorial, e punto di maneho ta di un manera transparente, un maneho husto pa desaroyo di infrastructura, tereno y teritorial sostenibel.

“Nos a depolitisa e proceso di duna tereno haciendo esaki mas transparente y husto. Ningun hende por bisa cu e Minister aki a fix tereno pa su ruman pa traha hotel riba dje. E tipo di corrupcion cu a tuma luga prome cu mi, pa casi tur e ministernan prome cu mi, mester caba.

Tambe lo elimina e retraso den e peticionnan pa tereno pasobra tin hopi peticion atrasa. Tur esaki den cuadro alinea y den cuadro di e ROPV. Caminda ta necesario, e Ministerio lo duna tambe sosten den caso di ministerio di naturalesa pa bin cu un solucion structural pa loke ta e problema di RWZI.

Gobierno ta stimula construccion tambe pa hisa eficiencia di energia, adaptacion na clima, y tambe adherencia na regulacionann ambiental. Lo traha pa optimilisa uzo di tereno y espacio limita pasobra e realidad ta cu no tin hopi epsacio ni tereno mas pa duna. Lo duna sosten na Ministerio di Energia, Naturalesa, Asunto Economico, Desaroyo Sostenibel pa aporta na e maneho nacional di cambio di clima y di resiliencia.

Finalisando, Prome Minister Evelyn Wever-Croes a expresa: “Aruba ta pasando den e peor pandemia cu nos a conoce den historia moderno y ainda nos ta den. Ainda tin hopi insiguridad. Nos como Gobierno ta dispuesto pa enfrenta e retonan aki, pa tuma e decisionnan dificil cu mester wordo tuma pero principalmente pa guia nos pais den e rumbo di trankilidad, stabilidad y prosperidad.

Mi ta compara Aruba manera un barco nabegando den un lama hopi bruto, pero den union y solidarismo nos lo logra pa hiba e barco aki den awanan mas trankilo y yega e destino cu nos ta buscando”.