Prome Minister Evelyn Wever-Croes, dunando un toke diferente na su biahe di trabou pa asisti na e Reunion General di Nacionnan Uni na New York, a organisa, hunto cu Embahada di Reino, un ‘Lunch Meeting’ riba e SDG#16 cu representantenan di diferente otro pais den nos region.
Su Mahestad Rey Willem Alexander tabata e invitado special y hunto cu Presidente y Ministernan di paisnan chikito similar na Aruba, a delibera con pa logra metanan existente y proponi.
E tema principal di e evento aki ta integridad y bon gobernacion; ‘Con pa combati corupcion’, Con pa crea institutonan fuerte y transparente riba tur nivel’ y ‘Con pa crea plataforma pa mas cooperacion pa logra e metanan aki. Aruba ta lidera internacionalmente como isla chikito, den e rumbo pa bon gobernacion y integridad. Wever-Croes durante e almuerso aki a trece padilanti su pensamento y conviccion pakico integridad y bon gobernacion ta asina importante.
“Corupcion ta perpetua inigualdad y pobresa. Nos ciudadanonan a perde confiansa den nos gobiernonan, y ta door di inspira confiansa a traves di bon gobernacion, nos por gana nan confiansa bek. Aruba ta liderando den e ‘Small Islands Development States’ (SIDS) riba e tereno di integridad y bon gobernacion”, Wever-Croes a enfatisa.
Ta importante pa menciona cu Rey Willem Alexander tambe a expresa con importante e meta aki ta pa logra integridad y bon gobernacion. Y ta hunto como paisnan chikito, e posibilidadnan pa logra ta bira mas grandi. Y demas paisnan ta mira riba Aruba como ehempel pasobra Aruba ta liderando riba e tereno aki.
