Den aña 2022 Ministerio di Asuntonan General y Infrastructura a dedica hopi energia na optimalisa funcionamento di e aparato gubernamental, y e prome cambionan lo wordo implementa prome di januari.

A pone hopi enfasis riba digitalisa procesonan pa sigui mehora servicio na comunidad.

Tambe a traha riba elimina atraso den procesonan, den peticionnan regardando tereno pa por stimula nos economía, buscando semper e balansa entre desaroyo y conservacion di nos naturalesa. A pesar di e tantisimo investigacionnan cu ta andando, asina mes a logra traha riba miles di peticion y finalisa e procesonan.

Den cooperacion cu sector priva, ta desaroyando un proyecto di vivienda pa 330 famia.

Pa brinda mas siguridad den trafico, a construi varios rotonde, entre nan esun di Palm Beach, creando un situacion mas sigur pa nos turistanan y pa nos localnan.

Y pa 2023 lo sigui traha pa yega na mas eficiencia den e departamentonan di infrastructura y asuntonan general, pa aumenta transparencia y confiansa y pa sigui mehora servicio na comunidad.

Minister President ta gradici tur empleadonan publico y hefenan di departamento, pa e esfuerso y dedicacion den 2022 y ta spera di por sigui conta riba e mesun dedicacion den 2023.