Durante un conferencia di prensa di ayera nochi, cu Gobierno di Aruba a ofrece pa medionan local, prome minister Evelyn Wever Croes a expresa cu lockdown ta un medida cu no ta wordo contempla aworaki.
Bon Dia Aruba a puntra prome minister, mirando cu nan a scoge pa trece balans entre salud y economia, ademas di casonan positivo di Covid-19 cu a bira incontrolabel y e comportamento di poblacion cu segun nan a laga hopi di desea, un lockdown no ta na su luga na e momentonan aki?
Di esaki el a contesta cu nan no a scoge pa trece balans entre bida y economia. “Nos no ta pone bida di hende den un balans.” El a sigura cu den cierto momento nan a bisa cu como pais tin cu cuminsa custuma di biba cu e presencia di e virus, y pa esey nan ta tuma cierto decisionnan.
Tocante e lockdown, el a menciona cu esey ta un di e medidanan mas extremo cu nan tin riba mesa. Nan ta evalua cada caso, pero “den e crisis aki, cada decision cu bo tuma tin cu mira e origen di e problema pa por tuma e medida”.
E origen di e problema aworaki ta 60% na cas, cu ta trata di origen di contagio. Kiermen den famianan y eynan nan ta purba di conscientisa cada ciudadano pa nan ta mas cauteloso na cas.
E otro origen ta na pia di trabou, segun prome minister a señala y pa e motibo ey nan ta bin cu medida cu ta adresa e origen. Lockdown ta nifica cu e origen ta e turista y esey no ta e caso aworaki. “Den area di turismo nos no ta weita e contagio halto manera ta den nos hende local”.
Ademas, a specifica cu e medida aki no ta wordo contempla te ainda. E ta riba mesa, pero no ta bay implement’e na e momentonan aki pa motibo cu esey no ta e problema.
Tambe, den conferencia di prensa a trece dilanti cu fin di siman aki lo evalua si lo aplica algun medida, como shelter in place of ley seco. Asina tambe a pidi e uso di tapaboca obligatorio na luga trabou mirando e contagio halto cu ta existi na luga di trabou.
