Diahuebs mainta Prome Minister Evelyn Wever-Croes a ricibi sindicatonan SIMAR y SEPPA hunto cu docentenan di Emmaschool cu tabata na Bestuurskantoor pa expresa diferente preocupacion cu nan tin relaciona cu plannan di Minister di Enseñansa Rudy Lampe pa fusiona / uni, e scolnan Paso pa Futuro y Emma.
Premier Wever-Croes a expresa cu a tuma nota a traves di prensa, cu tabatin preocupacionnan andando pero no a haya un oportunidad pa ‘verdiep’ den e problematica. Sinembargo e grupo a presenta na Bestuurskantoor y a pidi pa atencion, pa cual Prome Minister a ricibi e carta. Den e carta nan ta duna splicacion di e situacion y ta pidi pa mas tarda diamars awo, bin un decision si ta para e fusion di e scolnan si of no.
Segun Prome Minister a splica, e ta dificil pa bisa di biaha si ta para algo cu tin di haber cu enseñansa, considerando e responsabilidad politico cu e Minister di Enseñansa tin cu carga. Y como Prome Minister ta boga pa e principionan di bon gobernacion wordo aplica y si ta trata cambionan grandi den maneho, cambionan cu ta afecta enseñansa special negativamente, esey ta cosnan cu tin cu vela pa no pasa.
Durante e reunion a scucha algun di e argumentonan cu e sindicatonan a trece dilanti y a comparti e plan cu sr. Lampe a traha cual e sindicatonan a indica di no a ricibi e plan aki.
“Mi tambe ta bay studia e plan y mi por bisa cu enseñansa special ta enseñansa cu ta hopi cerca di mi curason y nos muchanan special mester di hopi atencion. Ademas e trabou cu ta wordo haci pa enseñansa special ta grandisimo, p’esey e ta lamentabel pa mira e tension cu tin aworaki. Mi lo haci mi maximo esfuerso posibel pa trece trankilidad den enseñansa special pasobra nos muchanan mester di trankilidad pa atende cu e retonan diario cu nan tin”.
Premier Wever-Croes a conclui bisando cu lo trata e tema den Conseho di Minister y pa otro siman lo mester tin solucion.
