Aruba ta cera frontera cu brazil te ora cu tin mas informacion di efecto di e variante nobo di covid
E cifranan di contagio di Covid ta keda motibo di preocupacion. Na e momentonan aki tin 502casoactivo di Covid, a pesar cu a mira cu e averahe di cantidad di casonan pa dia a cuminsa baha den comparacion cu e cifra di dos siman pasa y siman pasa. Aworaki e averahe ta riba 40 casopositivo di Covid pa dia cual keto bay ta halto. Pero e cantidad di testnan positivo cu tin compara cu e cantidad di testnan cu ta wordo haci (positivity rate), ta bahando,asina Prome Minister Evelyn Wever – Croes a declara.
Situacion na hospital
Sinembargo den hospital tin un cantidad record di hende e aña aki. Desde e segundo ola di Covid aña pasa, ta prome biaha cu a yegana29hende den hospital di cual 10 ta den cuido intensivo. Semper a midi e forsa di con ta para cu Covid na e capacidad den hospital y cuanto di e capacidad aki nos ta uzando. 29 persona den hospital ta hopi y p’esey Prome Minister ta haci apelacion un biaha mas na henter comunidad pa tuma e tema na serio y sigui cuida.
Variante nobo di Covid y ciere di frontera
Henter mundo awor aki ta mirando e efectonan di e variantenan di Covid. Atende di variante di Inglatera, Brazil y mas. ‘Mirando con cerca Brazil ta di Aruba y mirando cu e variante di Brazil ainda ta desconoci con devastador su efectonan ta, nos ta haya nos ta cera frontera cu Brazil. Pues ciudadanonan di Brazil no ta permiti pa drenta Aruba te ora cu tin miho bista riba e efecto di e variante aki.’
Desaroyonan cu Hulanda
Mientras tanto Hulanda tambe ta tumando varios medida pa proteha nan mes y den e cuadro aki Hulanda a informa cu nan no ta cera frontera cu Aruba. KLM tambe a indica cu nan lo sigui bula entre Hulanda y Aruba.
Premier Wever – Croes ta anuncia esaki pa calma e nerviosismo cu tin bou di nos hendenan cu tabatin pensa di bay Hulanda of tin cu bolbe for di Hulanda.
“Mi kier pidi tur hende pa ta hopi alerta pasobra cosnan ta cambia hopi lihe y Paisnan por cambia nan maneho hopi lihe. Pa awo Hulanda a bisa cu e frontera ta keda habri y cu KLM a indica cu lo sigui bula, pero no por duna ningun garantia. Pues si tin cu biaha, ta sugeri pa sigui e desaroyonan internacional pa plania e biahe y pa no keda pega.’
Ban sigui cuida!
Pa conclui, drentando e fin di siman mirando tur e retonan nobo cu ta confronta cu e variantenan di e virus, Prome Minister kier a urgi tur ciudadano di nos Pais pa ban sigui cuida. Nos ta bringando un enemigo cu ta mortal, cu a ranca 56 alma caba for di nos na Aruba cu tabatin e virus ora cu nan a fayece. Ban evita cu mas famia ta pasa den e dolor y ban cuida mas, ban cuida nos mes y ban cuida nos famia. Aruba ta conta cu bo pa domina plamamento di e virus aki pa por concentra cu mas forsa riba recuperacion di nos Pais y crecemento di nos Pais.
