Prome Minister Evelyn Wever-Croes diabierna mainta a anuncia cu Hulanda y Aruba a yega na acuerdo na unda cu Hulanda lo duna e 10.9 miyon florin pa yuda Gobierno di Aruba pa enfrenta e crisis Venezuela. Na e mesun momento, e anuncio aki a wordo haci na Hulanda tambe.

E 10.9 miyon florin aki ta bay pa fortifica Aruba como pais, den haci Aruba mas sigur pa asina atende cu e crisis miho posibel. E ta pa yuda Aruba pa controla nos fronteranan miho pa asina nos percura pa domina e crisis cu nos tin internamente.

Segun e comunicado cu Bon Dia Aruba a ricibi ta indica cu na luna di mei cu a pasa, Hulanda a indica cu e ta dispuesto pa yuda Aruba y Corsou pa atende cu e crisis di Venezuela cu 23.8 miyon Euro cu ta alrededor di 55 miyon florin. Un gran parti di e 55 miyon florin Hulanda lo uza pa e mes yuda nos, y pa e otro parti Aruba y Corsou mester a entrega nan lista di plannan y proyectonan.

Control riba lama y tera lo bira mas estricto pa asina evita importacion ilegal di substancianan, arma como tambe di persona. E tema di mensenhandel y mensensmokkel (traficacion humano) ta un problema serio cu ta tumando luga demasiado hopi den nos region. Pa esaki lo inverti den ampliacion di Kustwacht, pa patruya nos awanan y asina evita importacion ilegal, y transporte ilegal di hende.

Tambe cu parti di e placa aki lo amplia e capacidad di detencion na unda esunnan ilegal por keda mientras nan ta warda e fecha cu nan wordo manda back nan pais. Esaki den e tempo aki ta hopi importante y necesario mirando e fluho di ilegalidad na Aruba a aumenta. Ampliacion di e capacidad di detencion lo trece mas trankilidad.

Parti di e fondo aki lo wordo uza tambe pa enseñansa temporal, pa muchanan cu ta bin for di Venezuela cu no por drenta nos scolnan, pa asina garantisa cu nan lo haya educacion durante e tempo cu nan ta na Aruba. Asina evita cu nan ta bira un peso pa comunidad y evita mas problema social.

E placa aki lo no ta disponibel pa crea vivienda of cubri otro gastonan di personanan cu ta bin haci peticion di asilo. Tampoco e placa por wordo uza pa cubri gastonan di operacion di Gobierno. E placa aki ta bay pa fortifica Aruba como pais, den haci Aruba mas fuerte y mas sigur, y asina por atende cu e crisis miho posibel.

“Mi ta hopi satisfecho cu nos a yega na e punto unda cu Aruba por haya e fondo aki. Hopi ta esunnan den departamentonan di Gobierno cu a traha hopi duro pa awe nos a yega asina leu y mi ta gradici nan. A pesar cu esaki no ta tur loke nos tin mester pa atende cu e crisis, nos ta gradici Hulanda pa e fondo aki, pasobra e ta sigur un bunita gesto di parti di Hulanda. E 10.9 miyon florin aki ta hopi necesario. Combina cu e helicopter, cu e radar cu pronto lo bin, Gabinete Wever-Croes lo percura pa haci Aruba mas sigur den tur circunstancia, cu of sin crisis di Venezuela. Nos compromiso ta un Aruba mas sigur pa cada ciudadano”, Prome Minister Evelyn Wever-Croes a duna di conoce.