Dialuna 29 di juni, den conferencia di Prensa di Gobierno di Aruba, Prome Minister Evelyn Wever-Croes a anuncia e condicionnan cu Hulanda a pone pa asina Aruba ricibi e fiansa di e 3de Tranche. Den e carta di dia 18 mei ultimo, den cual a duna e aprobacion di e fiansa di 2e tranche, Rijksministerraad (RMR) a pone como condicion pa e 3e tranche pa Aruba, cu mester bin un entidad cu lo ricibi e fondonan den futuro, y cu lo tene supervision con e fondonan ta wordo uza.
Segun un comunicado di prensa, Gobierno di Aruba a pidi mas informacion riba e entidad ey varios biaha, y diahuebs ultimo a wordo priminti cu lo manda esaki dialuna 29 juni, pues apenas 4 dia prome cu RMR cu lo mester a tuma luga diabierna 3 di juli. Sinembargo, e informacion aki no a wordo ricibi.
Hulanda mientras tanto, a pidi mas tempo pa manda e informacion por escrito tocante e entidad nobo cu nan kier pone como condicion. E tema di fiansa pa Aruba lo wordo trata den e reunion di RMR di 10 juli, un siman mas leu. Naturalmente esaki, Prome Minister ta remarca, ta pone mas presion.
Alabes, esaki ta pone cu e consultanan cu Gobierno a propone e siman aki cu gremionan y cu Parlamento, a wordo posponi cu un siman tambe.
Prome Minister a duna di conoce den e comunicado di prensa cu Gobierno lo mantene pueblo informa di cualkier desaroyo riba e tema aki.
