“Pa ta un bon mama, casa, amiga, yiu of colega nos mester cuida nos mes prome y pone nos mes como prioridad”

Dialuna a tuma luga na Marriott Hotel e evento espectacular pa hende muhe cu ta den un posicion di liderazgo, WOMEN LET’S TALK FORUM. Prome Minister a duna un discurso enfatisando cu cada hende muhe por briya cu luz propio mientras cu cada un ta yuda otronan briya hasta den situacionnan dificil den bida.

Como Minister encarga cu cuestionnan di genero, e enfoke clave di e administracion di Prome Minister ta pa empodera hende muhe grandi y chikito y pa logra igualdad di genero.

Rond mundo e ser femenino ta avansando mas cu nunca. No ta un secreto si cu ainda tin barera cu ta stroba e ser femenino, di cualkier antecedente, di logra nan maximo potencial y oportunidadnan incluyendo oportunidadnan pa ta na cabes di un compania of nacion. Den su discurso, Prome Minister a remarca cu e pandemia di Covid 19 a trece cambionan y avansenan den nos bida diario, relacionnan, scol of trabou pero tambe a trece retonan pa cada un di nos como hende muhe.

“E pandemia aki a pone nos enfrenta e hecho cu e avansenan cu nos a haci ta fragil y ta briya un luz riba e retonan cu e hendenan muhe a enfrenta. Rond mundo e ser femenino ta esun cu mas a wordo afecta door di e pandemia. Hopi a perde trabou, mester a tuma dianan liber sin pago pa cuida di nan yiunan door cu scol a cera y e cantidad di violencia domestico a subi.

Nos mester ta cauteloso cu un crisis temporario no hiba nos na un regresion structural pa loke ta trata igualdad di genero. Esaki lo no ta aceptabel, lo manda nos bek atras y lo tin un impacto negativo riba creacion di un sociedad mas fuerte, resiliente y igual.

Den mi punto di bista e solucion ta obvio. E retonan nos dilanti por wordo ataka si nos tuma den consideracion e papel cu e hende muhe ta hunga den nos sociedad y nos economia. Nos mester sigura cu e hende muhe por sigui riba e caminda pa ta independiente economicamente creando mas oportunidad pa cada un di nan den posicionnan di liderazgo.

Como lidernan femenino, nos ta laga nos mes por ultimo riba nos “to do list” ya cu nos ta tuma mucho cos riba nos mes ora ta toca famia, relacionnan of trabou. Pero nos ta consciente si cu pa nos ta un bon mama, casa, amiga, yiu of colega nos mester cuida nos mes prome.

Covid a impacta e bienestar di e trahado femenino profundamente mirando cu e probabilidad pa depresion, ansiedad y fatiga mental a subi entre e hende muhe trahado y esnan den posicion di liderazgo. Den comparacion cu e hende homber, e hende muhe ta hopi mas cansa y esaki mester cambia.

Mi ta urgi cada e doño di negoshi pa caba cu e epidemia di cansancio y stress. Den e mundo cu nos ta bibando, e bienestar di empleado no ta un beneficio mas sino un strategia. Unabes e empleadonan ta bon nan lo ta mas resiliente y productivo cual lo resulta den un compania resiliente. E formula ta simpel, hende muhe sano ta ekivalente na beneficionan saludabel.

Nos papel como hende muhe ta importante pa pone e cos aki traha. Mi ta encurasha tur lider femenino pa enfoca riba nos salud y bienestar general. Nos famia, comunidad y compania ta conta cu nos ta pone nos mes como prioridad. Sigur esaki ta mas facil pa bisa cu pa haci. Pero nos por siña di otro con pa logra esaki. Si cada dia nos inspira otro door di comparti nos experiencianan con nos a logra, sigur nos lo logra pasa door di nos retonan tanto na trabou como na cas, cu yiu, nietonan, casa, mama of tata, salud of financieramente”, Prome Minister a bisa.

Na final di su discurso, Prome Minister a ilustra: “No paga e luz di otro pa bo luz por briya. Tin luga suficiente den e universo pa tur nos luznan briya. Djis imagina bo con hopi luz lo briya si tur nos luznan ta briyando hunto. Nos por hasta ilumina e caminda scur di otronan cu ta pasando den scuridad di nan bida. Mi ta invita bo pa briya bo lus”.