Durante un conferencia di prensa di diadomingo ultimo, Bon Dia Aruba a puntra minister presidente Evelyn Wever-Croes ki consecuencia lo tin pa e tarifanan pa pueblo, mirando cu e clientenan mas grandi di Web y Elmar ta comercio, y esey a cay afo durante e luna aki cu e situacion di COVID-19.
Prome minister a contesta cu esaki ta un motibo di hopi preocupacion, door cu manera tur hende sa, Web y Elmar tabata purba di mantene nan tarifa pa comunidad abou pa via cu entrada tabata bin for di comercio y den e caso aki esey a baha drasticamente.
Asina mes, el señala cu nan ta buscando un balans na e momentonan aki pa wak si nan lo yega na e punto cu mester aumenta e tarifa. El a admiti cu ambos compania ta haci nan maximo esfuerso y nan ta cortando gastonan manera nan por, pa asina por wanta e golpi aki sin cu mester bay den aumento di tarifa.
Tambe, el a comenta cu ta importante pa sa cu esey ta e motibo pakico nan no por bisa cu tur hende lo keda sin paga awa y coriente pa tres luna cu ta bin dilanti; pa motibo cu mester corda tambe riba e dos compania estatal aki cu ta sumamente importante.
Pa e motibo aki, minister presidente a confirma cu nan ta buscando un forma. Pa esunnan cu tin problema pa paga nan cuenta di awa y coriente registra via e programa FASE y a traves di esey nan ta intermedia pa esunnan cu ta den e situacion aki. Tur otro persona cu no ta bin na remarca mester cumpli cu Web, Elmar, Setar y otro utilidadnan di manera normal.
