“Invitado di honor y orador principal, Secretario di Estado sra Alexandra van Huffelen”
Dialuna mainta durante conferencia di prensa di gobierno, Prome Minister Evelyn Wever-Croes a anuncia cu Gobierno y Universidad di Aruba lo ta organisando un conferencia di “Hende Muhe Fuerte” cu lo tuma lugar diamars, 24 di Mei 2022. E tema di e conferencia aki ta “Strong Women Choose to Challenge”.
E conferencia aki lo cuminsa cu palabra di e rector di Universidad di Aruba sra. Viola Heutger sigui pa e oradornan.
Gobierno di Aruba tin e honor di tin como orador principal di e conferencia aki, Secretario di Estado sra. Alexandra van Huffelen cu lo toca e tema di hende muhe den politica. Tambe lo hiba palabra Minister Xiomara Maduro elaborando riba e topico di inclusion di hende muhe den finansa di Aruba, sra. Clementia Eugene cu lo papia di salud mental y bienestar, cu ta un topico sumamente importante pa ser nan femenino tuma na cuenta.
Despues di e oradornan lo tin 2 panel pa trata e pregunta; Con nos por garantisa cu nos hende muhenan ta keda den posicion di liderazgo den futuro. E prome panel ta consisti di sra. Luenne Gomez-Pieters, Directora di Departamento di Impuesto, sra. Ronella Croes, Directora di Aruba Tourism Authority, sra. Maria Dijkhof-Pita, Directora di Departamento di Asuntonan Economico, y sra. Clarienne Croes di Women Empowering Women (WOW).
Prome Minister y Secretario di Estado Alexandra van Huffelen lo comparti e di dos panel na unda nan lo delibera riba e topico di: Hende muhe den politica, explorando bareranan, e forsa y e futuro.
Por ultimo, sra. Jocelyn Croes, Presidente di e comision di Sustainable Development Goals (SDGs) di Aruba lo presenta e Aruba Gender Policy. E documento aki ta e maneho di genero nacional di pais Aruba. Un documento sumamente importante na unda ta describi e situacion actual di desigualdad entre hende homber y hende muhe na Aruba, unda mester pone atencion y con pa combati e desigualdad aki.
Prome Minister ta extende un invitacion na comunidad di Aruba, pa sigui e conferencia aki live a traves di TeleAruba diamars dia 24 di Mei cuminsando di 10 am te cu 12 pm.
