Durante conferencia di prensa di Gobierno, prome minister Evelyn Wever-Croes a trece dilanti cu ora companianan estatal tin problemanan financiero gobierno no ta bin cu plan di emergencia pa por cubri aspectonan financiero di e companianan.
Asina mes, prome minister a splica cu companianan estatal manera Elmar, Web, Setar entre otro ta pasando den momentonan dificil y esey ta motibo pa cual nan a bisa cu personanan mester paga awa, coriente y otro utilidad pa motibo cu nan mester di entrada pa nan por sigui funciona.
“Gobierno no tin e forsa financiero pa tuma over e companianan si nan ta bay malo, na e momentonan aki gobierno tambe tin hopi problema”, el a sigura.
Ademas, prome minister a bisa cu cada compania ta trahando de un plan di contingencia cu ta cambia y ahusta cada biaha pa motibo cu esaki ta un crisis cu no a wordo conoci y mester ahusta, “te ainda nan no a bati alarma”, el a manifesta.
Tocante esaki ta importante pa trece dilanti cu comerciantenan a haya un carta di Elmar den cual ta expresa cu e crisis a cuminsa refleha riba cashflow di e compania estatal aki, tambe nan a pidi pa comerciantenan urgentemente no keda sin paga nan recibonan, e conclusion di analisis cu e compania a publica ta cu nan no por pospone e pagonan di recibo di coriente pa comerciantenan pa via cu lo afecta Elmar cu consecuencia cu no por paga su proveedornan.
Di mesun manera, prome minister a comenta cu gobierno tin un situacion dificil na e momentonan aki, nan a bay Parlamento pa exponi esaki y nan a haya aprobacion di 1.3 biyon florin cu segun e mes a sigura nan ta calcula pa por cubri e crisis y awor nan ta den proceso di busca e placa aki riba mercado internacional financiero.
