Gobierno a tuma nota cu tin hopi preocupacion y miedo entorno habrimento di scol. Gobierno a bisa cla y enfaticamente cu scolnan por habri den nivel 2, cu ta awe 18 di mei. E scolnan cu ta cla pa habri lo habri y e scolnan cu no ta cla no lo habri, tur a haya e protocol cu e condicionnan minimo cu nan mester tin in place y cada un lo traha nan propio protocol adicional y informa mayornan di kico ta e medidanan di precaucion cu nan a tuma.
Segun un comunicado di prensa, Gobierno ta na altura cu ora scol habri no ta manera antes y nos lo bay na un normal nobo cu ta inclui menos mucha den klas, menos contacto entre muchanan y menos contacto di mayor cu muchanan na scol y mas medida di precaucion.
Prome Minister Evelyn Wever-Croes a mustra su comprension cu e preocupacion y miedo cu ta biba den comunidad.
Wever-Croes a enfatisa cu Gobierno no ta bay obliga mayornan pa manda nan yiunan scol pero Gobierno tin un responsabilidad si y no tin niun hustificacion pa mantene e scolnan cera y p’esey scol lo habri cu hopi medida di precaucion. Diabiernalo duna informacion extenso na tur docente y na mayornan pa despues mayornan por tuma nan decision. Varios scol ta bon prepara caba, nan ta contento di por ricibi e muchanan cu hopi medida di precaucion. Tin hopi mucha contento cu nan por bay scol atrobe cu tur e medidanan di precaucion y esey ta importante pa nos pensa riba bienestar di e mucha.
“Un cos si e scol cu no por habri of e mayor cu ta dicidi di no manda su yiu scol tin cu garantisa si cu e mucha no ta wordo perhudica demasiado pues nan mes mester tuma medidanan di precaucion pa e muchanan cu no ta bay scol mas e aña escolar aki pa no wordo mucho perhudica den nan lesnan”, Wever-Croes ta finalisa den e comunicado.
