For di e ultimo reunion cu Prome Minister Evelyn Wever-Croes tabatin cu OFAC na Washington na luna di mei ultimo, e mandatario principal di nos pais den tur transparencia a bin ta anunciando den tur medio di comunicacion e plan di Gobierno pa cu refineria, cu ta consisti di tres fase:

Fase A: Purba sali for di e contract cu Citgo:

fase B: Interes di otro operadornan den e refineria:

fase C: Otro alternativa pa e refineria:

E negociacionnan cu na e momentonan aki ta andando ta di Fase A cu ta pa purba sali di e contract cu Citgo. Reunionnan preliminar ta tumando luga pa gobierno sondea e posibilidad di sali for di e contract aki na un forma mas lihe posibel, ta loke Prome Minister a duna di conoce. Segun e contractnan firma cu Citgo, gobierno di Aruba mester warda te october 2020 pa e ora por pone riba papel cu Citgo no a cumpli cu su palabracion di inverti den rehabilita e refineria.

E contract cu a wordo firma cu Citgo pa Mike de Meza y gobierno anterior, ta uno hopi amplio. E partinan di e contract cu ta deal cu ‘dispute resolution’ ta bastante amplio y ta duna Citgo derecho pa bringa e ponencia di gobierno di Aruba y nenga di duna Aruba e yabi di e refineria y riba dje hiba Aruba corte pa hopi aña despues di october 2020. Y esaki sigur no ta algo cu ta conveni pueblo di Aruba, por lo tanto gobierno ta haciendo tur esfuerso pa evita esaki.

Prome Minister Evelyn Wever-Croes a expresa: “Tin espacio pa yega na acuerdo cu Citgo sin cu tin mester 5 pa 6 aña of mas pa asina nos logra haya e yabi di e refineria den nos man. Na e momento aki, ta haci tur esfuerso pa yega na acuerdonan concreto. Nos expertonan di RdA, Raad van Comisario di RdA, ta reuniendo cu esunnan di Citgo y ta haciendo nan maximo esfuerso pa trece e yabi bek di Refineria di Aruba, entreg’e den man di gobierno di Aruba pa asina gobierno di Aruba por dicidi kico lo bira e futuro di e refineria y no keda rehen mas di un partner instabil manera Citgo ta na e momentonan aki. Un contract cu Mike de Meza y su gobierno hunto cu su gang a firma cu Citgo sin cu Aruba por sali di dje.”

Prome Minister un biaha mas ta enfatisa cu na e momentonan aki, no ta un momento pa hunga politica barata ni infantil manera señor de Meza ta haciendo, mientras cu ta e mes ta e culpabel di e situacion di rehen cu nos refineria ta den actualmente.

“Mi ta hopi transparente den esaki dunando informacion tur ora cu mi wordo pidi pa haci esaki, mi ta duna informacion den conferencia di prensa constantemente y den tur medio di comunicacion y mi ta duna informacion den Parlamento. Si señor de Meza tin interes di berdad, e por pidi informacion. Of e por acudi na su trabou den parlamento ora mi trece informacion den parlamento. Y e mes tambe por yama mi den Parlamento pa duna informacion”, Prome Minister a duna di conoce.

Prome Minister Evelyn Wever-Croes ta invita opositornan y specialmente señor Mike de Meza cu ta e causante principal di e situacion desastroso di refineria, pa para banda di pueblo di Aruba, y na banda di e interes di pueblo di Aruba. Na e momentonan aki cu Aruba ta pasando den e situacion penoso aki cu nos refineria, Prome Minister Evelyn Wever-Croes ta enfatisa cu awo no ta tempo pa pensa riba privilegio y beneficio di Mike de Meza y su gang sino riba e bienestar y beneficio di pueblo di Aruba. Y esaki lo pasa ora cu Aruba sali for di e contract cu Citgo.