“Mi ta pidi tur hende pa no perde speransa. Ban keda positivo pa asina nos por surpasa e reto aki mas lihe cu ta posibel”
Diaranson merdia, durante un entrevista cu señor Baboe Hoek di Power 101.7 FM, Prome Minister Evelyn Wever-Croes a elabora riba e proyecto di Hotel Secrets, cu ta programa pa bin na San Nicolas entrante aña 2024.
Prome Minister a splica cu e motibo cu Gobierno ta keto na e momentonan aki pa loke ta e situacion di e hotel, ta pa motibo cu tin un veredicto di hues, na unda ta pone un stop na e construccion di Hotel Secrets. Lamentablemente, tin un grupo di hende cu no ta di acuerdo pa construi un hotel den e area aki, y a entrega un accion contra e “bouwvergunning” di e hotel.
Gobierno na su turno, no tabata di acuerdo cu e veredicto di hues, y a apela, pero no a haya rason. Prome Minister a indica cu e trabounan pa cu e construccion di e hotel a cuminsa legalmente, tur permiso ta otorga y tur papel ta legalmente na ordo. E ta den ley si, cu unabes habitantenan tin cierto obhecionnan, nan mester wordo scucha. Pa loke ta e veredicto di hues, Prome Minister ta kere cu respetuosamente hues a haci un eror y cu pronto lo bin claridad.
Prome Minister a expresa cu e ta sumamente importante pa comunidad di Aruba sa, cu Gobierno ta sostene y ta kere den proyecto aki, y lo sigui bringa nan posicion, cu speransa cu husticia lo prevalece. Tambe el a indica cu e proyecto aki lo no solamente trece desaroyo economico pa pais Aruba y pa San Nicolas, pero tambe lo mehora e bida social di tur esunnan cu ta habita den e area aki, mirando cu nan lo por eherce nan trabou cerca di nan hogar. Prome Minister a splica cu tin un palabracion haci entre Gobierno di Aruba y Hotel Secrets, cu na momento di aplicacion pa trabou, esunnan cu ta biba den San Nicolas, lo tin prioridad pa haya trabou eynan. Esaki sigur ta un alivio grandi pa e habitantenan di San Nicolas di no mester lanta extra trempan tur mainta pa por yega na pia di trabou na ora.
Loke Prome Minister a splica tambe ta cu e proyecto aki no solamente ta beneficia esnan cu ta biba na San Nicolas pa haya trabao sino tambe esunnan cu ta desea di habri un negoshi chikito, pa asina por brinda servicio na e turistanan hospedando den e hotel. Esaki ta e motibonan pakico Gobierno lo haci su maximo esfuerso pa logra haci e proyecto aki un realidad.
Pa loke ta e desaroyadornan, Prome Minister a indica cu Gobierno tin un bon comunicacion cu nan, y cu nan ta sumamente agradeci pa e sosten cu Gobierno ta brindando nan. Si yega e momento na unda cu nan lo dicidi pa no sigui mas cu e proyecto aki, causando un daño prehuicio na pais Aruba, Gobierno lo entama un caso contra esunnan responsabel pa cu esaki.
“Mi ta pidi tur hende pa no perde speransa, ban keda positivo pa asina nos por surpasa e reto aki mas lihe cu ta posibel,” Prome Minister Evelyn Wever-Croes a expresa.
