E siman aki, Gobierno di Aruba a tuma despedida di CEO di Aruba Airport Authorities (AAA) James Fazio y a brinda bon bini na e CEO nobo, Joost Meijs. Den su discurso e anochi aki, Prome Minister Evelyn Wever-Croes a subraya e decision strategico asina importante cu e Minister encarga cu turismo na 2004, Edison Briesen, a tuma pa cera e partnership cu Schiphol Groep.
“Hunto cu Schiphol Groep y AAA a hiba nos aeropuerto na e siguiente nivel, y awe nos por bisa cu siguridad cu e vision strategico di Gobierno di Nelson Orlando Oduber na 2004, tabata un bon vision. Awor AAA ta den pleno ehecucion di e proyecto di $300 miyon “Gateway 2030”, cu lo genera crecemento economico, lo genera cupo di empleo y lo haci di nos aeropuerto e hub den nos region”, Wever-Croes a enfatisa, segun un comunicado di gobierno.
AAA a inicia e Proyecto di expansion Gateway 2030 cu ta crucial pa e desaroyo di nos pais y garantisa e exito di e implementacion di nos vision. Fazio, kende tabata CEO di AAA pa e ultimo 5 añanan, tabata e motor tras di proyecto importante aki pa nos pais. E proximo CEO, Joost Meijs, lo tuma over e responsabilidad pa guia e desaroyo di maneho, organisacion y mantene contacto cu e stakeholders como tambe pa e inversion di 300 miyon dollar aki.
“Awe nos ta despedi di un CEO di AAA N.V., Fazio y na mes momento nos ta duna bon bini na Joost Meijs. Den nomber di Gobierno di Aruba, Hunta di Directiva, staf y empleadonan di AAA, usuarionan y nos comunidad, y como Prome Minister, mi ta gradici Fazio pa su apoyo continuo pa haci di nos aeropuerto E hub den nos region. Nos ta desea Fazio exito den esfuersonan nobo. Na e CEO nobo, Meijs, nos ta desea tur cos bon y exito sperando pa traha hunto cu Meijs y su personal pa asina hunto logra metanan pa nos pais”, Wever-Croes a expresa.
