Ayera mainta, prome minister Evelyn Wever-Croes a duna un conferencia di prensa pa trece dilanti varios topico, entre nan un update di Covid-19, conferencia di 35 aña di Status Aparte, CAft y sosten di likides.

Pa loke ta trata Covid-19, Wever-Croes a indica cu october tabatin hopi reto na unda a logra stabilisa e crisis. “Nos no ta afo ainda, pero nos a logra stabilis’e.” Pa loke ta trata datonan, te cu ayera dialuna tabatin 171 caso activo; na comienso di october tabatin 227 caso door di e di cuater ola di Covid-19 causa pa e variante Delta.

Di hospital, Wever-Croes a trece dilanti cu na e momentonan aki nan ta pasando den un mudansa debi na trabaonan di reconstruccion. El a indica cu pa via di Covid-19 nan a pospone e mudansa pa hopi luna y esey ta costando hopi placa. Cu esaki nan ta keda cu un deficit na unda ta falta 33 cama, loke ta pone cu e presion riba hospital ta birando mas grandi y e capacidad ta mas chikito.

Loke nan ta spera pa e luna nobo aki ta cu nan kier ta extra cauteloso, pa motibo cu capacidad di hospital ta menos, y pa asina por yega na final di november, cu ta cuminsa e temporada halto pa cu turismo, pa asina no implementa medidanan adicional ni na december ni na comienso di januari.

“Un descuido awor ta pone cu nos high season of nos dianan di fiesta nos tin cu pasa nan paden un biaha mas y esey ta loke cu nos kier evita”, Wever-Croes a sigura.

Ademas, el a declara cu Merca a bin cu un medida adicional for di dia 8 di november, na unda cu esnan cu kier biaha pa Merca mester wordo vacuna. El a enfatisa cu e exigencia aki ta di Merca y no di Aruba, unda cu biaheronan mester tin e dos vacuna.

El a declara cu el a tuma nota loke a sucede fin di siman ultimo cu fiestanan di Halloween, comentando cu ta hopi importante pa hende realisa cu “si nos kier yega na fin di aña den un ambiente un poco mas normal, stabilisa manera nos tin’e, nos tin cu haci mas pa cuida nos mes”.

Conferencia 35 aña di Status Aparte “Aruba ta di nos tur”

E aña aki Aruba ta celebra su 35 aña di Status Aparte.
Pa esaki, Wever-Croes a bisa cu dia 1 di januari di 1986 Aruba a drenta den status diferente aki, cu ta locual a contribui na exito di Aruba. Durante comienso di aña nan a cuminsa celebra e hecho historico aki, pero debi na protocolnan di Covid-19, no por haci mucho actividad. Y aworaki cu medidanan ta mas flexibilisa nan lo kier haci un conferencia di “35 aña di Status Aparte – Aruba ta di nos tur”.

Pa evento aki, segun Wever-Croes, ta bay tin medidanan di prevencion pa Covid-19. E evento ta bay tuma luga di forma hibrido dia 23 di november for di 9or di mainta te cu 12or di merdia, cu algun persona na e luga y na mesun momento e lo wordo transmiti via medionan di comunicacion social pa tur hende por wak’e .

“Durante e conferencia aki, nos lo bay refleha, analisa, unda nos tabata ta, unda nos ta awor y principalmente unda nos kier yega como pais” Wever-Croes a expresa.

Diferente panelista y oradonan lo ta presente pa elabora riba kico status aparte a nifica pa Aruba realmente, tambe con Aruba a desaroya riba tereno economico, social, educacion, cultural, etc. Wever-Croes tambe bisa cu nan ta espera di conta cu e presencia di tur ex-mandatario pa motibo cu cada un di nan a contribui na e exito cu Aruba tin awor.

CAft y Sosten di Likides

Wever-Croes a menciona cu pa algun tempo nan ta den negociacion cu Hulanda pa e sosten di likides pa e di cuater kwartaal di e aña aki. Pero esaki no ta cla ainda, manera CAft a menciona diabierna di siman pasa.

Si Aruba no lo haya e sosten di likides aki , “nos mester hala faha mara” manera Wever-Croes a sigura. Nan a cuminsa caba como gobierno unda cu minister di Finanzas, Xiomara Maduro a emiti cartanan, cu pa 15 di october a cuminsa caba pa cera gastonan adicional pa gobierno. Tur loke por wordo posponi ta wordo posponi, segun Wever-Croes a enfatisa.

Esaki ta conta no solamente pa ministernan sino pa departamentonan di gobierno cu lo sigui cu nan servicionan vital pa nan por continua.

CAft den su conferencia di prensa a comparti con Aruba ta bayendo, na unda Wever-Croes a expresa cu Aruba ta bayendo bon. El a duna elogio riba e parti di turismo y tambe pa e parti financiero. Segun calculacion di gobierno pa e aña aki Aruba ta mira un crecemento di 13.9%.

Tambe desempleo a cuminsa baha, algun di esnan cu a perde nan trabao pa via di Covid-19 y a haya FASE no tin trabao ainda; pero e gran mayoria si. Esaki ta motibonan pa CAft yega na e conclusion cu Aruba ta bayendo economicamente den bon caminda y ta p’esey cu CAft a sigura cu Aruba no mester di sosten di likides.

“Nos ta di opinion cu si tin mester di sosten di likides pa algun gasto. Pero manera m’a bisa nos ta na mesa cune pa dialoga y delibera”, Wever-Croes a manifesta.

Un otro area cu tin problema tambe ta esun di gasto di salud, unda cu CAft a trece dilanti un biaha mas e tema di reduccion di 60 miyon florin. “Pero pa nos ta hopi honesto, nos tambe sa cu gastonan di salud manera nan ta awor, no por continua. Pasobra sino aki dos pa tres aña nos ta haya na sea ta hisa e primanan of baha e pakete. Bo tin cu tuma decision, si no bo ta perde full e AZV”, el a enfatisa.

Pa esaki nan ta trahando un plan, segun el a indica, pa wak con nan ta bay atende e gastonan aki di salubridad riba termino cortico, termino mediano y termino mas largo.

CAft tambe a menciona cu un otro area di preocupacion ta gastonan di personal di gobierno. Nan ta haya cu gobierno mester baha esakinan, y nan a menciona specificamente ‘overtime’, cu na Aruba ta demasiado halto comparando esaki cu otro islanan.

A trece dilanti cu tin algun compania cu te ainda ta paga menos cu e 100% di salario mirando nan situacion financiero, pero asina mes turismo ta bayendo bon y poco poco Aruba ta recuperando. Pa esaki, Wever-Croes a expresa cu esaki ta un comentario di varios persona den comunidad, y cu mirando e proyeccion cu AHATA y Ministerio di Turismo a presenta siman pasa, no tin mucho espacio pa ta pagando hendenan menos de la cuenta. El a comenta cu si subsidio di salario ta cay afo, e ora ey no tin un base mas pa doño di trabao corta den salario di trahado. Ee riesgo ta si cu si e doño di trabao no por carg’e nan ta bay kita trahado.

“Den esaki minister di Labor tin un trabao hopi grandi pa busca e balansa” el a finalisa.