ORANEJSTAD – Den ultimo dianan, Mike Eman, lider di AVP, ta expresa su odio contra Gabinete Wever-Croes. Na un forma y negativo sr. Eman ta instiga y purba sembra odio den pueblo. Prome minister Evelyn Wever-Croes a expresa cu e forma aki di sr. Eman pa hiba politica ta tipifica politica bieu di pasado cu pueblo a rechasa. Mike Eman ta rabia y ta sembra odio pasobra nos economia ta stagna. Prome Minister ta recorda Mike Eman cu ta e mes y su partido AVP a ocasiona un situacion na unda awe nos economia ta stagna.

“Locual cu sr. Eman tin rason ta cu nos economia ta stagna. Y e sa miho cu tur hende con stagna e ta pasobra ta e mes a laga nos economia asina stagna. El a hiba su gobernacion basa riba cifranan y irealistico y supuesto solucionnan pa gaña cu economia lo a crece. Cuanto biaha den su proyeccionnan el a habri e refineria? Bisando cu economia ta bay crece door di e refineria? Y kico e realidad ta: e refineria ainda ta cera.

Pero, pakico keda pega den pasado cu tanto odio y rencor. Pueblo a rechasa esey. Pueblo kier un solucion y p’esey nos ta trahando riba un vision economico agresivo. No a trece solucion. Contrario na e vision di sr. Eman pa endeuda nos pais pa crece economia, nos ta contra di mas debe pa nos pais. Vision di gabinete Wever-Croes ta pa crea varios pilar economico cu ta yuda nos Pueblo.

Un bes mas, sr. Eman tin rason cu situacion financiero ta malo. Ta e mesun mal maneho financiero di e gobierno anterior di AVP ta wordo sinti ainda. Lamentablemente su consecuencianan ta doloroso.

Na aña 2009 e debe nacional tabata rond di 40%. Den apenas 5 aña di gobierno di AVP, e debe a wordo redobla.

Esey a pone cu nos a cay bou di curatela financiero y ni e ora ey nan a logra pone nos financia publico riba e bon rumbo, pasobra tanto e gobierno di e tempo ey como e institutonan di supervision incluyendo CAft, a faya.

Nan a aumenta gasto di personal drasticamente. E ex prome minister Mike Eman cierto momento tabata tin un staf di como 300 hende ta traha pe. Despues di supervision financiero el a hay’e obliga di baha e cantidad pero asina mes a keda cu casi 200 hende. Ami ta trahando cu un staf awor di 10% di esey!

Asina y bahando cantidad di minister nos a baha gasto di e ministernan cu 27 miyon florin y parti di dje a wordo inverti den departamentonan cu hopi aña a wordo neglisha.

Nos a inverti den estadistica y awor nos por mira e efecto di nos maneho estricto riba tereno di financia.

Aña pasa nos a cera aña cu un deficit mas abou cu presupuesto. Pa e aña aki nos ta premira e deficit di mas abou den hopi aña, 25 miyon. Y e aña aki ta e ultimo aña cu nos tin deficit. Entrante otro aña Aruba lo conoce un surplus. Algo unico cu ta solamente gobiernonan di MEP a logra den pasado.

Nos debe den porcentahe di GDP ta baha asina. Awor e ta na 78%!

Loke mester remarca tambe ta cu den e 8 añanan di gobierno anterior, den cual a redobla e debe, mes momento a bin cu mas di 30 medida di medida y den nan un cantidad record di impuesto nobo pa nos pais. Asina mes a crea deficitnan gigantesco y a redobla e debe.

Gobierno di Aruba a hay’e obliga di introduci un crisisheffing temporal na principio di nos gobernacion, pero despues a bin cu Reforma Fiscal y a elimina varios belasting caba. Pasobra den ultimo 8 añanan nos pueblo a wordo confronta cu asina tanto impuesto nobo, sin haya ningun compensacion di impuestonan cu por a wordo elimina pero no a wordo elimina.

Gobierno di Aruba a cuminsa cu elimina successiebelasting pa tur hende. Nos a elimina inkomstenbelasting y loonbelasting pa 30 mil persona cu tin un entrada di 27 mil florin pa aña. Nos a elimina grondbelasting pa 12 mil hende. Y asina nos lo sigui cu e Reforma Fiscal, e cambio husto. Pa baha e impuesto cu tur hende ta paga riba entrada of salario, p asina abo tin mas placa den bo man y abo dicidi con y na kico bo ta gasta e placa.

Pueblo a rechasa politica anticua y pueblo kier solucion. Y nos ta trahando pa solucion. En bes di mas impuesto nos ta trahando riba menos impuesto, manera ya nos a elimina successiebelasting pa tur hende, loonbelasting y inkomstenbelasting pa 30.000 hende y grondbelasting pa 12 mil hende! Esaki ta e realidad ta cu sr. Eman no kier pa pueblo sa.

E trabou ta grandi, e situacion financiero cu nos a hereda ta serio. Pero nos no ta yora of keha. Nos a lora manga, y tuma accion. Y maske cu lo tabata mas facil pa keda pafo di politica na e momento aki, nos a carga nos responsabilidad. Sr. Eman a scoge pa keda pafo di politica y asina traiciona su 7000 y pico votadonan. Esey ta ‘kiezersbedrog’.

Ami a carga mi responsabilidad maske no ta ami ta e culpabel. Ta Mike Eman ta e culpabel di nos situacion financiero malo, e debe enorme y un economia stagna. Mike Eman a scoge pa no carga su responsabilidad.

Nos no ta esunnan cu a causa e problemanan financiero, pero nos lo solucione si. Poniendo e ser humano central, creando progreso y bienestar pa tur ciudadano, specialmente pa nos muchanan y hobennan.

Conciudadanonan, nos no a yega ainda, pero nos ta riba e bon caminda y creando confiansa tur caminda.

Den e dianan aki di preparacion pa nos dia nacional, mi ta invita un y tur, ban uni pa Aruba. No mester tapa e luz di un otro pa bo luz briya mas. Ban nos tur briya nos luz, y ilumina e caminda hopi mas y pa hopi mas hende.