E rumornan cu ta circulando cu, di banda di Venezuela lo kier habri frontera bek cu Corsou ,Bonaire y tambe kier pa Aruba habri su frontera, tin e atencion di Gobierno di Aruba.
Gobierno ta buscando confirmacion di esaki, mientras ta compronde cu cierto deliberacionnan ta andando den e relacion di Reino y Venezuela. Sinembargo, enfaticamente Prome Minister Evelyn Wever-Croes a expresa cu Aruba a cera frontera cu Venezuela na mei ultimo y e frontera ta keda cera por lo pronto.
Segun e comunicado cu Bon Dia Aruba a ricibi ta indica, cu e Prome Minister a indica cu mientras cu Aruba no ta completamente prepara pa e fluho grandi di persona riba nos pais, frontera entre Venezuela y Aruba ta keda cera. Na e momentonan aki, Aruba ta pasando retonan grandi y ta rekeri tur energia pa atende cu e retonan den nos pais prome.
“Gobierno di Aruba ta convivi hopi cu e problemanan cu tin na pais bisiña Venezuela y ta desea cu pronto por bin resolucion. Pero ta momento pa corda riba Aruba. Ta p’esey, den e bienestar di Aruba, e fronteranan ta keda cera te ora cu Aruba ta cla y prepara pa atende cu e fluho grandi di persona”, Prome Minister a enfatisa.
Gobierno di Aruba ta haciendo preparacionnan pa atende cu e problematica aki. E introduccion di ESTA: Esaki ta un aprobacion electronico cu esunnan di Venezuela tin mester prome cu e subi avion y bin Aruba. E Schiphol Model tambe ta den preparacion. Esaki ta e modelo cu ta wordo aplica na Schiphol Hulanda. Ora cu e persona drenta Aruba y pidi asilo, e ta wordo hiba den detencion den un centro pa maximo 28 dia mientras cu su peticion pa asilo ta wordo trata y decision wordo tuma. Despues cu a resulta cu gran mayoria di persona cu ta aplica pa asilo, ta haci esaki riba base ekiboca, haciendo mal uzo di e sistema di asilo pa haya un permiso temporario, Gobierno di Aruba a hay’e obliga pa bin cu e maneho aki.
“Na e momentonan aki, Aruba tin su propio retonan, nos tin nos oportunidadnan, pero tambe nos tin nos ley y reglanan cu ta keda vigente na Aruba. Kiermen un persona por ta na Aruba solamente si e tin un status legal. Y por traha solamente si e tin un permiso pa traha. Aruba lo sigui cumpli cu su regla y leynan. Aruba su frontera cu Venezuela ta keda cera te ora cu Aruba ta cla pa habri esaki bek”, Prome Minister Evelyn Wever-Croes a duna di conoce.
