Durante un rueda di prensa diahuebs mainta, Prome Minister Evelyn Wever-Croes a anuncia cu a keda cla cu formacion di Gabinete Wever-Croes II, despues di 76 dia di eleccion.

“Algun hende ta haya cu el a tarda demasiado, pero na mi parecer el a tarda loke e mester a tarda. Pa mi Pasobra un gobierno stabil y fuerte, ta rekeri un fundeshi fuerte. Y pa ami como formador, mi kier tabata sigur cu e candidatonan cu mi presenta na Aruba ta digno di confiansa”, Prome Minister Evelyn Wever Croes a duna di conoce den un comunicado di prensa.

Dia 25 di juni, Partido MEP a gana eleccion cu 9 asiento y Partido Raiz a haya 2 asiento. Dia 8 di juli 2021, a firma un declaracion di intencion. Dia 9 di juli, exactamente 2 luna pasa, Gobernador a nombra Prome Minister como formador. Den e 2 lunanan aki a negocia un acuerdo di gobernacion den lineanan grandi, despues reparticion di cartera y awor ta asina leu cu a keda cla cu formacion di Gabinete Wever-Croes II.

Prome Minister a uza un quote di George Washington pa ilustra e seriedad di e proceso di formacion di un gobierno. “To form a new Government requires infinite care, and unbounded attention; for if the foundation is badly laid the superstructure must be bad.”

“Formacion di un gobierno ta un proceso serio cu ta exigi hopi cuido y atencion pa construi e fundeshi di confiansa y stabilidad. E periodo tras di lomba tabata un periodo duro pasobra banda di mi trabou diario como Prome Minister y como commander in chief di e crisis di Corona, mi tabata Parlamentario y Formador tambe”, Prome Minister a remarca.

Prome Minister a gradici tur esnan cu a yuda den e proceso aki. Tur e 115 stakeholders cu a reuni en conexion cu formacion di Gabinete Wever-Croes II. Den e dianan venidero lo reuni cu demas stakeholders.

“Awor pues nos por cuminsa goberna. Na final di dia gobernacion ta teamwork, trabou den ekipo y partnership. Y nos, Gobierno, Parlamento, sector publico y sector priva, lo demostra esaki trahando hunto. Un ekipo cu un solo meta: ARUBA. Gabinete Wever-Croes 2, e Gobierno cu pueblo a scoge pa goberna. Na tur nos votadornan, di curason DANKI pa boso sosten duna na nos Partido MEP y na Partido Raiz. Danki na tur ciudadano di nos pais Aruba, nos lo lora manga mesora pa sigui traha, pa enfrenta tur reto, den tur transparencia comunica cu comunidad y nos lo sirbi bo na e miho forma posibel. Nos lo no defrauda bo. Cu Dios bendiciona nos dushi pida baranca Aruba”, Prome Minister pa Gabinete Wever-Croes II a termina bisando.