Diamars atardi na un conferencia di prensa, Prome Minister Evelyn Wever-Croes (MEP) hunto cu Minister di Labor Glenbert Croes (MEP) y Minister di Finanza Xiomara Ruiz-Maduro a papia tocante e cifra di desempleo, cu a baha durante 2018.

E cifra di desempleo a baha bou maneho dirigi riba creacion di cupo di empleo y percura pa nos hende desemplea haya trabou. Despues di haya informacion importante di Minister di Labor, por anuncia cu e cifra di desempleo general, cu na aña 2017 tabata na 8.9%, a baha na 7.3% pa 2018, segun Wever-Croes.

Un aspecto importante ta e desempleo bou di hoben, cu tabata un cifra halto. Na 2017, e cifra di desempleo bou hoben tabata 19.4%. Tur hoben cu tabata busca, no por a haya trabou, pero mediante un esfuerso cu a haci durante ultimo tempo, e cifra aki a baha na 16.2%.

Segun Wever-Croes, esfuerso cu ta haci pa crea cupo economico, pa locual ta dirigi maneho economico riba dje, ta pa crece economia riba su mes.

Minister Glenbert Croes a bisa cu esunnan cu a contribui cu investigacion a haci esaki na gobierno y tres departamento en particular, cu tabata encarga cu encuesta di forsa laboral. Departamento di Arbeid Onderzoek DAO, CBS Central Bureau Statistiek y Centraal Bank di Aruba.

Ta duna señal di ‘bon rumbo y positivo’ di cifra nacional na 2018. Sinembargo segun investigacion, ainda tin 4.068 persona desemplea. “Nos ta haciendo trabou corecto despues di hereda un crisis social”, Croes a bisa.

Den comparacion cu otro pais den region, manera Corsou, Sint Maarten, Barbados, Jamaica y Bahamas, Aruba tin menos porcentahe di desempleo. Croes a bisa cu esey ta un ‘gran satisfacion’ mirando cu e refineria ta cera y considerando e situacion actual di Venezuela.

Xiomara Ruiz-Maduro a bisa cu ‘economia di Aruba ta lorando’. Sinembargo, e meta principal ta un calidad mas halto di bida pa tur ciudadano. “Un punto sigur ta stimula crecemento economico pa reduci costo di bida. Cosnan ta birando caro. Nos a amplia canasta basico, pero esey no ta e unico factor pa yuda reduci gasto y ta trahando riba esaki.”

A puntra Wever-Croes tocante e inkietud cu ta keda cerca varios studiante cu ta caba Universidad di Aruba, y nan no ta haya trabou cu nan diploma. Algun di nan ta haya pa via di conexion, anto e otro ta haya trabou cu nan no a studia p’e. E resto simplemente no ta haya trabou. Ki speransa tin pa nan, cu nan kier traha di loke nan a studia, pero no ta mira ningun solucion den nan carera? El a contesta cu esey ta un punto di preocupacion cu ta haya constantemente.

Sinembargo, pa duna speransa el a bisa riba e parti di desaroyo economico, cu lo trece dilanti desaroyo den diferente area cu tin pa nos hende. Den pasado, e desaroyo tabata construccion y refineria, unda no tabata crea cupo pa tur hende y ademas tabata trece trahadonan di afo.

Tocante maneho economico den 6 sector prometedor, a papia tocante diversificacion den turismo. Pa no crea mas hotel grandi, diversifica den area cu hende ta prepara p’e y por duna otro calidad di trabou. Turismo medico, turismo di arte, unda hende por traha nan mesun souvenir local sin cu mester importa.

E di dos area ta economia di conocemento. “Den nos hoben cu tin preparacion y no ta haya trabou. Un pais cu por ta laboratorio den energia solar, energia di lama. Tambe e facultad nobo (red:STEM) cu ta brinda oportunidad na nos hende.”

Logistica ta e di tres area prometedor, cu por ta e servicio maritimo, aereo pa haci un trabou den economia di agricultura tradicional, innovacion y tecnologia. Tin e parti di economia secular, cu ta ‘waste to energy’ cu ta industria cu awa friu, recycle y uzo di otro pilarnan economico.

E industria creativo tin interes den arte di musica, diseño grafico, moda. A traves di desaroyo den area aki, tin hoben cu ta traha den dje y esunnan cu tambe ta den industria creativo por traha den dje.

Tambe a puntra Wever-Croes tocante persona cu tin diploma halto di Masters cu doctorado. Nan ta aplica na varios departamento di Aruba, sinembargo nan ta bisa cu e ta mucho ‘over qualified’ y no ta tum’e. Cu ta prefera tuma un persona Hulandes, Mericano of un local cu tin conexion, sin wak e diploma cu tin. Ki minister por bisa algo di esaki?

Wever-Croes a bisa no ta caso cu e conoce, pero en general, cu tur esunnan cu ta bin cu diploma mester acomoda mas tanto posibel. “Mi conoce tempo di scol Edward Cheung, kende tabata inteligente y ta traha na NASA, na Aruba hamas lo tin desaroyo asina. Como gobierno nos tin tarea y responsabilidad, pero nos tin limitacion”, el a finalisa.