Diaranson atardi na Renaissance Convention Center, Camara di Comercio di Alemania pa di tres aña a organisa un conferencia di energiana Aruba, German Green Technology Conference. Esaki, Prome Minister Evelyn Wever-Croes a indica,ta costa Gobierno di Aruba ni un placa. Desde inicio di Gobernacion di Gabinete Wever-Croes, a para e green conference cu e gobierno anterior tabata organisa cu tabata costa gobierno hopi placa. E topico cu a wordo trata ta ‘Smart buildings for sustainable Caribbean islands.
Prome Minister den forma virtual a duna inicio na e conferencia di energia y a comparti e plannan cu Gobierno tin pa cu energia. Despues di un aña turbulento, Aruba su vision y metanan di energia cu ta cla pa wordo publica. Pa logra nos meta di energia y clima, Gobierno a tuma e inicativa pa alinea stakeholders basa riba un vision comun cu metanan cla. E ‘National Energy Policy’ a wordo desaroya den consulta estrecho cu companianan di utilidad y otro stakeholders. E vision ta: Garantisa acceso na energia limpi, confiabel y pagabel pa tur ciudadano, compania y bishitante.
Cu esaki tambe Aruba lo ta den mesun liña cu e Metanan (Mundial) pa Desaroyo Sostenibel, e asina yama “Sustainable Development Goals (SDG’s)” di Nacionnan Uni. Un cantidad di pais a comete nan mes pa yuda combati cambio di clima door di reduci nan emisionnan. Aruba tambe tin intencion di bay comete su mes na metanan realistico.
Na final di dia, e meta cu nos kier logra ta pa yega y mantene un bon balansa entre naturalesa, medio ambiente y economia. Si algo e pandemia aki a siña nos, ta pa fiha metanan cu ta realistico y hustifica. Y esaki ta loke cu nos a haci tambe. E solucionnan pa e retonan di mas grandi cu Aruba tin den e transicion di energia no necesariamente ta technologico. Mucho mas importante ta e aceptacion social y participacion activo di ciudadanonan y e sector priva den e transicion di energia. Pa e motibo aki mi ta convenci cu Aruba lo logra su metanan di energia involucrando stakeholders, sigui cu conbersacionnan y traha hunto cu nos comunidad y nos socionan den e transicion di energia”, Prome Minister a expresa.
Prome Minister a gradici e delegacion di Alemania pa nan compromise na innovacion den Caribe. Gradiciendo nan tambe pa e establecimento di e prome ‘Smart Energy House’ den e ‘Smart Community’ na Aruba. Prome Minister a expresa su deseo pa sigui traha cu e grupo Aleman aki riba gran innovacionnan cu lo wordo cultivana Aruba. Nos por mustra technologianan cu no solamente lo ta pionero, pero cu tambe por yudanos y nos region pa acelera nos metanan di clima y di energia renobabel atraves di edificionan di futuro.
Comments are closed.