Manera tur aña den bispo di Aña Nobo, prome minister Evelyn Wever-Croes ta manda un mensahe na tur ciudadano riba e isla aki pa recorda cu un aña remarcabel e cual tabata 2023 a caba, denomina como “Aña di Union y Positivismo,” awor pa 2024 e prioridad ta pa tin stabilidad, progreso, prosperidad, inversion y innovacion.

“Na comienso di aña mi a menciona cu aña 2023 lo ta un aña cu lo inclui hopi cambio y sacrificio cu hunto nos lo tin cu carga. Pasobra mi tabata sa cu ta asina so nos por carga e peso di compromisonan financiero cu Aruba a keda cune despues di e pandemia, y e debenan di prome cu pandemia. Nos a enfrenta obstaculonan cu a pone nos pasenshi y resistencia na prueba. Sinembargo, ta e momentonan aki ta demostra berdaderamente e spirito di union y determinacion cu ta inculca fuertemente den cada Arubiano.”

Pa loke ta trata e logronan, prome minister a manifesta cu nan a logra nan metanan di recuperacion y crecemento economico.

Institutonan internacional a considera e recuperacion di Aruba, impresionante, sigur si compar’e cu demas pais grandi y chikito. “Nos por ta hopi orguyoso di e logro aki, pasobra nos a logr’e danki na e trabou duro di cada un di e ciudadanonan cu ta biba riba nos pais. Como lider di nos pais, mi ta gradici bo pa bo aporte valioso den e recuperacion di nos pais. Pero nos meta no tabata pa mira solamente crecemento economico y recuperacion, esey tabata e forma pa logra e meta real; y e meta real ta crea cuponan di empleo pa mama y tatanan di famia, pa crea oportunidadnan pa nos hobennan desaroya y bira exitoso, pa trece trankilidad back den nos hogarnan.”

E prome paso tabata pa trece finanzas publico na orden, sino no por haci nada. Prome minister a sigura cu nan a presenta e presupuesto na tempo, cu un surplus cu ta cumpli cu tur norma y cu esaki Aruba ta e unico pais den Reino cu pa dos aña consecutivo tin surplus riba e presupuesto cu ta asina necesario pa baha e debe nacional halto.

Turismo a crece y surpasa tur expectativa, e bishitantenan ta sigui encanta cu e gran cordialidad, cu ta e grandesa di nos pueblo, manera nos Himno Nacional Aruba Dushi Tera ta bisa.

Danki na esaki, economia a crece mas di loke a ser premira, cu a brinda e oportunidad di haci inversionnan cu pa hopi tempo no tabata por, teniendo cuenta cu un balans entre inversion y medio ambiente. Inflacion, apesar cu e ta halto, a cuminsa baha y ta mas abou cu den otro paisnan den region.

Crecemento di economia a crea cuponan di empleo y desempleo ta na e punto mas abou cu e tabata den 20 aña, e necesidad di empleo combina cu un maneho husto di integracion, lo sigui sostene e crecemento di e pais.

E retonan riba tereno di infrastructura a ser atendi den 2023 pa asina e maneho den infrastructura tambe por sigui sostene crecemento di e pais.

Despues di hopi aña, enseñansa a mira inversion den un scol nobo, scol St Aloysius na Noord. Tambe a sigui mira inversion den innovacion a traves di e proyecto EduTec, como tambe restructuracion di henter sistema di educacion, cu contribucion di tur stakeholder.

Esaki, combina cu oportunidadnan nobo den deporte, a brinda e hobennan mas oportunidad pa distraccion sano, specialmente awor cu e renobacion di stadion Guillermo Prospero Trinidad na Dakota.

E maneho riba tereno di husticia, combina cu camaranan di siguridad, Warda di Polis nobo, y ekipo pa Cuerpo Policial, a haci Aruba mas sigur. Tur esaki a brinda mas posibilidad pa pone mas atencion na e ser humano.

Atencion a bay na cuido di salud, y con pa preveni problemanan di salud. Y pa bringa problemanan social den comunidad. Mas atencion a ser poni specialmente di e dos gruponan mas vulnerable, adultonan mayor y esnan cu problema cu salud mental.

E foro di Adulto Mayor a trece tur hende hunto pa prome biaha pa traha riba un maneho pa mehora calidad di bida di adultonan mayor na Aruba.

E crisisteam y fact team a ser reenforsa pa duna cuido y atencion mesora na esnan cu problema cu salud mental y nan famia.

“Pues nos a logra nos metanan di recuperacion y crecemento economico den 2023. Locual nos no a logra ainda e aña aki, ta pa e prosperidad aki yega den cada rincon di nos pais. Ainda tin famianan cu ta pasa den duro, cu mester traha dos, of hasta tres trabou, pa logra cubri e gastonan. Costo di bida a aumenta debi na e inflacion cu nos ta importa riba cada cos cu nos cumpra. Pa e motibo aki nos a aumenta salario minimo, y pensioen di biehes, y baha prima di AZV pa pensionadonan un biaha mas.” Prome minister a señala.

Manera a menciona caba, 2024 ta e aña di stabilidad, progreso, prosperidad, inversion y innovacion, pa asina consolida e crecemento cu a conoce den 2023, pa duna e stabilidad cu nos mester den nos pais, den nos comercio, den nos hogarnan, pa e progreso y prosperidad por yega den hogar di cada ciudadano. Progreso y prosperidad crea a base di inversion y innovacion.

“E Meta di nos gobernacion ta pa nos logra establece un isla cu un economia productivo y stabiel, un pais cu por paga su debenan y alabes inverti den su futuro, pa crea oportunidadnan pa nos futuro generacionnan. Un isla cu un desaroyo sostenibel y husto, cu por brinda un calidad di bida cu salud, progreso y felicidad pa un y tur, specialmente pa esnan mas vulnerable. Un comunidad cu ta trata otro cu respet, cu tolerancia y cu ta inclui tur hende den e progreso y prosperidad.” El a sigura.

E prome pasonan ya ta tuma, a logra pa e pais recupera lihe despues di pandemia, awor ta sigui pa logra e meta pa cada ciudadano por tin un bida digno riba e dushi Aruba.

“Nos a drenta un aña nobo, y esaki ta un oportunidad pa nos cada un fiha e metanan cu nos kier logra den e aña 2024. Mescos cu Gobierno a haci pa nos pais, cu nos kier stabilidad y progreso, nos cada un por fiha e metanan cu nos kier logra pa nos mes personalmente, pa nos famia, pa nos estudio, profesion of negoshi. Aña 2024 ta bira e aña di stabilidad di nos pais, pa Aruba por progresa, y pa asina e prosperidad y felicidad por yega den cada hogar na Aruba. Hunto nos a logra, y ta Uni nos por sigui logra!” prome minister a finalisa.