Ayera mainta Prome Minister Evelyn Wever-Croes a duna un discurso den e acto protocolar pa conmemora 25 di januari, e fecha di nacemento di Gilberto François Croes, miho conoci como “Betico Croes”, cual a tuma luga cu presencia di diferente mandatario tanto di Aruba como di otro pais. A reuni conhuntamente cu Su Excelencia Gobernador Alfonso Boekhoudt den e Plasa Betico Croes for di oranan di mainta.

Betico Croes ken a bay den un edad di 48 aña y cu danki na su determinacion, perseverancia, curashi y specialmente danki na e sosten di un pueblo uni a logra cosnan grandi pa Aruba y a logra pa awe nos ta biba den un pais autonomo den Reino, Prome Minister Evelyn Wever-Croes a sigura.

“Mi ta sigur cu nos tur ta di acuerdo cu danki na nos status aparte nos por a desaroya nos pais den un di e paisnan lider den region. Betico, un persona cu den un bida corto a laga un legado grandi tipifica pa determinacion, perseverancia, curashi y lucha pa union”, Prome Minister a expresa.

E tabata un tata di cuater yiu, un esposo, un yiu y un ruman cu tabata omo di Prome Minister mes e cual e ta cualifica como un persona cu un carisma enorme cu semper tabatin atencion pa tur hende, mes cos cu su mesun yiu y e mes a bisa den un di su discursonan cu nan ta considera un di su discursonan di despedida na Ser’i Noka na november di 1985, cu e no ta un tata di un hogar tipico di mama, tata y cuater yiu sino, un tata particular den henter Aruba unda cu e dia ey el a bisa cu e ta spera cu su yiunan ta orguyoso di dje, “mescos cu tur yiu di e pueblo akinan,”el a bisa.

Como politico, el a demostra con ta lidera cu curason poniendo e pueblo na prome luga, con ta lidera cu respet pa otro dunando respet y ora tabata exigiendo respet, el a mustra cu mester duna espacio na hende muhe den politica pa motibo cu mas participacion di hende muhe den politica y den puestonan importante di gobernacion ta trece un miho balansa den tuma di decision cu ta concerni tur hende.

El a mustra cu pa logra e meta, tin mester tin biaha di dal un paso chikito atras pa despues por dal pasonan grandi dilanti, el a siña e importancia di stima e pais, di stima e simbolonan di libertad, e himno y bandera, unda e tambe a mustra e importancia di union, “pasobra el a bisa cu un pueblo uni hamas lo ser venci.”

Awor ta den cada un ciudadano pa sigui cu e principionan y e balornan cu Betico a mustra y a conduci na logronan grandi pa Aruba.